E botikanan di Fundashon Mariadal ta luchando ku eskases den kapasidat di personal pa un tempu kaba. Mas ku klaro, esaki tin konsekuensianan ménos agradabel pa e servisio botikario di parti Fundashon Mariadal. E proseso di hiba resèpt na botika pa tuma remedi ta dura awor mas largu ku nòrmal pa e pashènt. Pa e motibu aki ta trahando duru riba solushonnan riba término kòrtiku, pero tambe solushonnan struktural riba término mas largu, pa asina sigui garantisá kalidat, seguridat i kontinuidat. Lamentablemente, un solushon riba término kòrtiku ta e limitashon den e servisio na bali pa Botikanan Korona i Playa.
E Botikanan Korona i Playa ta brinda e servisio di kustumber solamente pa un parti di dia: esaki ta e kaso parti mainta na Botika Playa i parti mèrdia na Botika Korona. A konsekuensia di esaki, un pashènt por bai semper na bali di un di e botikanan di Fundashon Mariadal ku un resèpt di urgensia. Durante e otro parti di dia e botikanan aki no ta será, pero nan ta keda habrí solamente pa tuma resèptnan repetitivo pa asina e pashènt por pasa tuma su remedi despues. Botika Rincon ta habrí atrobe durante e orarionan di kustumber i pues ta prosesá resèpt henter dia. Fundashon Mariadal kier pidi komprenshon i alabes ta rekomendá pashèntnan pa entregá resèpt trempan na nos botikanan pa asina haña e remedi na tempu.
Fundashon Mariadal ta buskando personal nobo kontinuamente, pero e proseso aki ta kanando hopi slow. Faktornan ku ta hunga un ròl den e eskases na kapasidat ta prinsipalmente e efektonan di e pandemia di COVID-19, kual tin e konsekuensia ku personal ta sea stòp di traha òf ta lucha ku kansansio. Alabes tin tambe e problemátika di eskases pa personal di kuido na nivel mundial. Dor di esaki Fundashon Mariadal a duna inisio na diferente trayekto pa regulá e eskases di personal di kuido di forma struktural i riba término largu, denter di 6 pa 12 luna.
Algun ehèmpel ta ku ta duna inisio un bes mas na e estudio pa asistènt botikario via di Akademia FM, introdukshon di servisio di ‘bode’ ku ta hiba remedi te na kas pa pashèntnan ku desabilidat òf ku no por mobilisá fásil pa un òf otro motibu, i tambe konstrukshon di un botika nobo na Antriol. Un otro solushon ku Fundashon Mariadal a bin ta prepará ya pa algun tempu kaba, ta introdukshon di mashinnan outomatisá ku ta hasi entrega di remedi. E solushon aki ta pèrmití e pashènt tuma su remedi mas fásil i na e orario deseá, lòs for di e orario regular di servisio.
Turesten ta sigui traha pa realisá e solushonnan riba término kòrtiku dor di buska personal for di Hulanda Oropeo i, kaminda ta nesesario, limitá e servisio na bali. Esaki por resultá den un tempu di espera un poko mas largu pa haña remedi. Fundashon Mariadal ta perkurá pa seguridat den e proseso di entrega di remedi. Ta spera ku por normalisá e servisio na bali di Botikanan Korona i Playa den e próksimo dos simannan, esaki despues di e yegada i preparashon di e asistèntnan botikario.
Fundashon Mariadal ya ta preparando pa inisiá e proyekto pilóto pa e servisio di ‘bode’. Finalmente Fundashon Mariadal kier pone e servisio di ‘bode’ disponibel pa Boneiru kompletu. Ta bon pa ripití ku e medidanan menshoná akiriba ta nesesario pa por sigui garantisá kalidat, seguridat i kontinuidat. Pa loke ta trata e solushonnan riba término mas largu, ta spera ku e inovashonnan lo trese un kambio drástiko den servisio di kuido botikario.