Fundashon Kòrsou Transparente ta konmemorá e di 10 aniversario di e publikashon di e ‘National Integrity System Assessment’ (NIS) di Transparency International di 2013 ku un seminario informativo (breakfast seminar). Durante un konferensia di prensa riba 4 òktober 2023 na Landhuis Klein Kwartier, Sr. Michael Hernandez, presidente di Fundashon Kòrsou Transparente (Kòrsou Transparente), a presentá e meta i aktividatnan di e fundashon i alabes a anunsia e seminario ku lo tuma lugá riba djabièrne 8 di desèmber, ku e tema: “Integrity In Governance: A prerequisite for sustainable growth in Curaçao”.
Orador prinsipal: Lousewies van der Laan
Sra. Van der Laan, direktora di Transparency International Hulanda, ta trese un rikesa di eksperensia di organisashonnan internashonal manera Korte Internashonal di Hustisia, Eurojust i politika di Hulanda. Ademas, e a traha huntu ku kompanianan i NGO’s lokal i Internashonal I ademas a okupá diferente posishon di supervishon. Su konosementu i ideanan ta di un balor ínkalkulabel pa e seminario aki. E disertashon prinsipal lo ta sigui pa un diskushon den forma di panel. E nombernan di e miembronan di e panel lo ser
anunsia na un momentu posterior.
Durante e konferensia di prensa, Sra. Nelly Schotborgh, kende tabata e investigadó prinsipal di e rapòrt, a bai un tiki mas den detaye di e relevansia di e rekomendashonnan di e rapòrt di Transparency International. Durante e seminario, Sra. Schotborg lo refleha di un forma konsiso tokante e desaroyonan na Kòrsou for di e fecha di publikashon di e rapòrt.
Kòrsou Transparente ta un organisashon non-profit ku ta dediká su mes na promové transparensia, integridat i kombatí korupshon na Kòrsou. E fundashon a wordu fundá komo un inisiativa di siudadano, reakshonando asina riba lokual a ser konstatá den e rapòrt, kaminda e vulnerabilidat di Kòrsou pa ku korupshon a wordu deskubrí.
Un grupo di persona ku na e momentonan ey tabata envolví den e kreaashon di
e rapòrt, a funda Kòrsou Transparente. Di tur manera kier a evitá ku e
rekomendashonnan no ta keda kumplí ku ne i ku e rapòrt ta desaparesé den un
lachi.
Pa konemorá 10 aña di e publiksashon di e rapòrt aki, e seminario lo tuma lugá
riba djabièrne 8 di desèmber 2023, kual ta un dia promé ku e Dia Internashonal
Kontra di Korupshon di Nashon Uní den 2023.
Sr. Daniël Corsen lo funshona komo moderadó durante e seminario. Kòrsou Transparente ke gradisí e sponsornan prinsipal, manera Banko Sentral di Kòrsou i Sint Maarten, Maduro & Curiel’s Bank, Curaçao Airport Partners, Aqualectra, Lionsdive Beach Resort Curaçao, Curaçao IFA i PSB Bank, pa nan sosten I konfiansa. E organisashon ta gradisí tambe e otronan sponsornan ku a opta pa no bai den publisidat.
Hernandez ta enfatisá ku tur hende ta bon biní na e evento. E temanan di integridat, transparensia i korupshon ta di suma importansia, pasobra nan no ta afekta solamente e individuo pero tambe tur persona den un komunidat, den sektor privá i publiko. E partisipashon di kada un di nos ta kontribuí na un miho futuro i beinestar pa Kòrsou.
E seminario ta kuminsá 8or di mainta (porta ta habri for di 07:30) i lo kontinuá te ku 12or di merdia. E ta tuma lugá na Banko Sentral di Kòrsou i Sint Maarten. E presentashonnan durante e seminario lo ta na Ingles, pero tur partisipante por ekspresá nan mes na nan idioma preferí.
Karchi ta kosta ANG 175,= i ta disponibel for di 4 di òktober serka e miembronan di direktiva di Kòrsou Transparente. Por tuma kontakto ku nos pa karchi i mas informashon tokante e evento aki via nos página di Facebook Korsoutransparente, nos email korsoutransparente@gmail.com, òf via e presidente, Michael Hernandez, na 529-9150