Ariba dia 1 di februari 2020 Fundacion Telefon pa Hubentud Aruba a start cu e proyecto UNICEF Kinderrechten Kinderrechten Filmfestival 2020. Unicef Kinderrechten Filmfestival ta consisti di diferente parti. Pa medio di UNICEF Kinderrechten Filmfestival muchanan di scol basico ta siña tocante na derechonan.
Primeramente ariba 1 di februari docentenan di klasnan 4, 5 y 6 di Cacique Macuarima School, Colegio Santa Filomena, International School of Aruba, Reina Beatrix School y Scol Paso pa Futuro a ricibi un training tocante e materia di derecho di mucha. Despues di esey e muchanan a ricibi les tocante derecho di mucha. Atraves di diferente ejercicio e alumnonan a siña tocante nan derecho. Despues cu e alumnonan a ricibi e lesnan tocante nan derecho, nan a traha un pintura tocante un di e derechonan. Esaki por a ta e derecho cu nan a gusta mas, e derecho cu pa nan ta mas importante of esun cu nan tawatatin mas pregunta tocante di dje. Despues cu e pinturanan tawata cla a saca un ganador di cada klas, y despues a saca un ganador di cada scol.
Di e pintura ganador di cada scol, un ‘filmcoach’ mester a traha un pelicula. Net na momento cu e ‘filmcoachnan’ tawata di bai drenta den e scolnan pa graba e peliculanan, Aruba ser confronta cu su dos prome casonan di Covid-19. Door cu na Aruba e cantidad di persona contagia cu Covid-19 tawata bastante, no por a sigui cu e proyecto na e manera original. Door di esaki e proyecto mester a ser adapta varios biaha tendiendo cuenta cu e seguridad y salud di tur e muchanan cu tawata participando na e proyecto.
Door cu e risiconan pa contagio na Aruba tawata halto na momento di haci grabacionan, cuatro di e cinco scolnan cu tawata participando na e proyecto no por a sigui cu grabacion di e pelicula. E scol cu si por a sigui cu grabacion di pelicula ta Cacique Macuarima School. Debi na esaki e pelicula di Cacique Macuarima School lo ta e pelicula cu lo ta participando den nomber di Aruba na e final di e ‘UNICEF Kinderrechten Filmfestival’ 2020.
E aña aki e final lo tuma lugar den cuadro di dia nacional e internacional di derecho di mucha na e forma virtual ariba diasabra 21 di november. E paisnan cu lo ta participando ta Aruba, Bonaire, Curacao, St. Eustacius y Saba. Na Aruba e alumnonan di Cacique Macuarima School lo sigui e final for di e studionan di Telearuba. E titulo di e pelicula di Cacique Macuarima School ta ‘pause’ y ta basa ariba e derecho number 27 di e Tratado di Derecho di mucha cu ta derecho ariba cuminda, un cas, paña y mas.
Fundacion Telefon pa Hubentud Aruba hunto cu UNICEF Nedeland ta desea pa Aruba henter mira e final di UNICEF Kinderrechten Filmfestival’ 2020 y tambe duna sosten na e alumnonan di Cacique Macuarima School. Pa e motibo aki Aruba henter por mira e final di UNICEF ‘Kinderrechten Filmfestival’ 2020 via di Telearuba cuminsando pa 3:00 di atardi.
Un gradicimento ta bai na Cacique Macuarima School, Colegio Filomena, International School of Aruba, Reina Beatrix School y Scol Paso pa Futuro pa a participa na e proyecto. Tambe nos kier a gradici e ‘filmcoachnan’ cu ta Juan David Villar Steffens, Juan Francisco Pardo, Armando Goedgedrag, Efraim Odor y Paula Nahr pa nan contribucion. Por ultimo gradicimento ta bai na UNICEF Nederland y Ministerie van ‘Binnenlandse Zaken en Koninkrijkrelaties’ pa e sosten financiero.
Pa mas informacion tocante Unicef Kinderrechtenfilmfestival 2020 por tuma contacto cu Fundacion Telefon pa Hubentud Aruba via nos website: 131.aw, facebook: https://www.facebook.com/telefon.hubentud/, email: telhubentud@gmail.com of telefon 5886138.
