Desde 1999 Fundacion Telefon pa Hubentud Aruba pa medio di su servicio ta duna informacion, opcion y sosten emocional na mucha y hoben di Aruba. Pa haci esaki Fundacion Telefon pa Hubentud Aruba ta haci uzo di diferente instrumento manera: telefon, email, chat, website, charla, workshop y proyecto. Desde maart y juni di e aña aki Fundacion Telefon pa Hubentud Aruba ta dunando informacion, opcion y sosten emocional pa medio di telefon na e muchanan y hobenan di St. Eustatius y Saba tambe.
Fundacion Telefon pa Hubentud Aruba e aña aki lo cumpli 23 aña dunando servicio na nos muchanan y hobenan di Aruba. Pa por prepara Fundacion Telefon pa Hubentud Aruba pa e proximo 20 aña y tin un organisacion sostenibel, actualmente nos ta incorporando diferente instrumento sostenibel. E logo di Fundacion Telefon pa Hubentud Aruba ta un di e instrumentonan aki. E logo actual a zorg pa e organisacion tawata reconocibel durnate 23 aña caba.
Ta importante pa bo organisacion y e trabao cu bo organisacion ta haci por ser representa pa medio di bo logo. E norma, balor, vision y mision di bo organisacion mester ser refleha den bo logo. Na e manera aki bo lo comunica cu bo grupo di meta mas efectivo.
Fundacion Telefon pa Hubentud Aruba ta un organisacion cu ta traha pa y cu mucha y hoben. Esey kiermen cu no solamente ta duna informacion, opcion y sosten emocional na mucha y hoben, pero tambe ta scucha di mucha y hoben con nan ta pensa cu e servicio di Fundacion Telefon pa Hubentud Aruba mester ta. Despues cu nos Jongerenraad a conseha nos di con pa yega na un logo nobo, nos a tuma e stap di bai busca e idea y pensamento for di nos muchanan y hobenan.
Pa yega na un logo nobo Fundacion Telefon pa Hubentud Aruba ta organisando un competencia di pintura bao di mucha y hoben. For di e pinturanan aki Fundacion Telefon pa Hubentud Aruba lo haya ideanan pa incorpora den e logo nobo. Na e competencia aki ta participando 1208 mucha y hoben di 7 scol basico y 5 scol secundario.
Di cada scol lo saca un pintura ganador. E mucha/ hoben cu pinta e pintura ganador di su scol lo presenta su creacion na un grupo di hurado. Na final lo saca un pintura ganador di scolnan basico di Aruba y un pintura ganador di scolnan secundario di Aruba. E mucha y hoben cu a crea e pintura ganador lo ricibi un premio cu e por uza pa cu su educacion y den su tempo liber.
Pa mas informacion tocante di e competencia di pintura por tuma contacto cu Fundacion Telefon pa Hubentud Aruba via nos facebook: https://www.facebook.com/telefon.hubentud/, email: telhubentud@gmail.com of telefon 5886138/ 5884011.
