Ester van der Put ta fundado di Fundacion Snoop Doggy . For di aña pasa a cuminsa cu e fundacion y na mes momento nan ta na altura cu tin diferente organisacionnan cu ta rescata cacho unda cu ta castra y of ta cuida cacho, pero loke cu ta keda falta ta e parti di educacion. Esaki no ta culpa di ningun di e fundacionnan y organisacionnan paso e trabou ta asina grandi cu ta bezig den e parti di cuido y prevencion. Sinembargo den e parti pa educa e comunidad y e ciudadano cu ta doño di un cacho of pushi, esaki hopi biaha ta keda afo.
Pesey mes Fundacion Snoop Doggy ta existi unda cu a traha un buki pa por bay na tur scol. E buki ta papia di un cacho cu ta keda adopta y ta keda trata cu amor door di e famia. Na mes momento e buki ta educa e mucha kico tur ta e responsabilidad pa tin un cacho na cas. E storia ta keda conta den un nivel di mucha pa e mucha por sa kico kiermen na momento cu ta desea of kier un mascota na cas y kico tur rond di dje ta e responsabilidad nan cu mester tene na dje banda di duna e animal e amor cu e merece.
Sinembargo no lo presenta solamente un buki di cacho , pero lo presenta un buki di pushi tambe. E dos bukinan aki lo wordo parti na tur scol basico klas 3 y 4 .Fin di e luna aki lo cuminsa parti e bukinan pero na mes momento tambe e scolnan cu ta desea tambe lo por duna un presentacion na e muchanan. Cu e presentacion aki lo hiba dos animal na scol pa asina splica y mustra e mucha y tambe e chip cu e cacho lo tin pa e no perde.
E dos bukinan di cacho y pushi ta pa e muchanan di scol basico , pero banda di esaki tin un otro buki cu ta pa e hobennan cu lo keda parti na e scolnan di traimerdia unda cu nan por siña mas kico ta e cuido pa cu un bestia di cas.
Tambe fundacion Snoop Doggy ta bay tin un actividad “Kids Fun Walk”cu lo keda organisa diasabra 5 di october, Na e actividad aki tambe lo laga e muchanan y hobennan haya sa mas di e reglanan pa cu un cacho y pushi na cas.
Banda di e caminata ta bay tin diferente weganan rond di e actividad pa asina e muchanan por pasa un dia dushi cu famia y na mes momento nan ta educa nan mes riba cuido di bestia na cas.
Pa participa na e “Kids Fun Walk” ta costa solamente 10 florin pa asina nan por recauda fondo pa asina traha mas buki pa conscientisacion di cuido di bestia na Aruba.
