Durante luna di November, empleadonan di Fundacion pa nos Muchanan (FPNM), Tienda di educacion, Fundacion Respeta Mi y Centro pa Hoben y Famia a sigi y completa e Train de trainers cursus di Curiculo pa mayor ‘Stima Mi Guia Mi’.
Stima mi Guia mi (Stima bo Yiu, Guia bo Yiu) ta un programa educativo pa mayor hunto cu nan yiu(nan) entre e edad di 0-4 aña. E enfoke ta riba mehoracion di e laso emocional entre mayor y yiu y promocion di e desaroyo optimal di e yiu. E programa aki a inicia na 2021 como un programa piloto y a clausura recientemente na september. Loke ta haci e programa aki unico ta cu e mayornan a participa hunto cu nan yiu (nan), alaves tawata tin momentonan pa e mayornan pone locual nan siña den practica cu nan yiu. Durante e workshops a toca e temanan di: E importancia di e prome añanan, introduccion di mayor sensitivo y responsivo, e relacion entre mayor y yiu, e importancia di desaroyo social-emocional, limite y disciplina, desaroyo social-emocional pa medio di hungamento y interaccion durante actvidadnan diario & plan di sosten pa un mucha.
Te awor un total di 60 mayor cu nan yiu a participa na e programa piloto y a impacta sigur un 180 hende positivamente si nos conta un averahe di 3 persona pa famia.
Mirando e feedback positivo di e mayornan cu a participa den e projecto piloto y e logro den impacto den desaroyo di mucha, e partnersnan a refleha riba e futuro rumbo di e programa. E pensamento central tabata cu e programa tin un balor grandi, cu tin cu garantisa e continuidad y cu tin cu purba di haci’e accesibel preferibel pa un grupo di participante mas grandi.
Pa e motibo aki FPNM den colaboracion cu Kiwanis Club of Palm Beach a organisa un Train de trainers cursus pa tur e partnersnan cu lo fugi como trainer den e curiculo pa mayor ‘Stima Mi Guia Mi’. Di e forma aki ta percura cu tur trainer ta ekipa cu e mes un informacion y ta ‘riba un linea. MSc Sra. Roke Hoen, docente ‘Health Promotion y personal development’ y Drs sr. Earl Euson ‘Onderwijskundige’ tabata e oradornan durante e training. E training tawata yena cu informacion practico y tambe actividadnan interactivo, entre otro, intercambio di conocemento y experencia di ‘responsive care parenting’ y conceptonan strategico di e programa; formula un vision comun; observa, señala y guia mayor den implementa conocemento y habilidadnan den practica y metodonan pa stimula cambio positivo den actitud.
Nos ta felicita tur e participantenan, gradici nos oradornan y alaves Kiwanis Club of Palm Beach pa nan tremendo sosten durante henter e trajectoria di Curiculo pa mayor ‘Stima Mi Guia Mi’.
Nos ta tuma e oportunidad tambe pa informa mayornan di muchanan entre 0 pa 4 aña pa keda pendiente pa e siguiente tanda di Stima Mi Guia Mi cu lo inicia den comienso di 2023.
