Fundacion MiJu, bou iniciativa di dos docente Milly Koolman y Judesca Holsman, a lanta oficialmente na januari 2019 cu e meta pa yuda tur mucha y hoben bayendo scol den tur manera cu lo ta necesario pa nan lo por tin un aña escolar yena di goso y energia sin ningun preocupacion.
Manera custumber durante aña nos fundacion ta enfoca riba 2 actividad grandi pa recauda fondo; 1. Adopt a Child for Back 2 School y 2. Christmas of Hope.
Nos fundacion ta traha cu liña estrecho cu e directiva y team di cuido di e scolnan. Via e canal aki nos ta ricibi tur aña un lista di nomber di e mucha-/ hobennan cu ta bin na remarca pa ayudo social-economico-financiero.
Pa e campaña di Adopt a Child for Back 2 School nos fundacion ta cubri e schoolgeld di cada mucha/ hoben, nos ta duna nan 2 uniform y un tas cu tur articulo necesario pa nan por cuminsa e aña escolar nobo.
Pa e campaña di Christmas of Hope nos ta regala cada famia un basket yena cu comestibel y boca dushi pa asina nan por celebra un Pasco y Aña Nobo feliz y contento.
Tur esaki sin mas no por ta posibel sin e fondonan necesario. P’esey nos kier participa cu nos fundacion ta organisando un “Back 2 School 5th Anniversary Fundraising Bike Ride” dia 3 di augustus 2024.
Dia 31 di juli 2024 nos lo tin nos anochi di inscripcion pa e Back 2 School 5th Anniversary Fundraising Bike Ride cu lo tuma luga aki mes na Alameda Café den John G. Emanstraat. Esaki lo ta di 6pm pa 10pm y lo tin un costo di Afl. 35,- pa persona, cual lo bay completo pa e ayudo di nos muchanan.
Dia 3 di augustus 2024 nos lo tin nos Ride oficial cu lo sali pa 6pm for di Alameda Café y lo termina na Alameda Café cu ungrandioso fiesta hunto cu Zeta Band y tambe manera custumber lo bay tin varios premio fabuloso pa rifa bou di nos publico y e bikernan.
Si acaso bo persona no ta desea di participa den e ride pero si ta desea di haci un donacion den efectivo esaki ta posibel for di awe caba ya cu nos tin un box disponibel aki mes na Alameda Café den cua bo persona lo por haci bo donacion. Tambe nos tin box na MIPA na Bloemond y na Pos chikito Rumshop.
Nos kier enfatisa cu tur tipo di bike ta bonbini den nos ride. Ademas nos kier invita tur hende cu kier bin pasa un diasabra agradabel yena di goso y alegria hunto cu nos, pa yega y forma parti di nos gran celebracion.
Pa esnan cu yega y kier haci un donacion, nos lo tin un box disponibel. Tur contribucion ta bon bini pa asina nos por cumpli cu nos meta. Nos meta principal pa e dia aki lo ta pa haya e fondonan necesario pa por yuda lo mas hopi mucha / hoben e aña aki pa bay scol bek feliz y contento, sin niun preocupacion.
Pa esnancu tadesea di haci un donacion bancario, ecuenta di Fundacion MiJu ta CMB 648.726.02 cu e descripcion di campaña di back 2 school. Tambe nos kier a probecha di e momento aki sigur pa gradici na prome luga Alameda Café cu a habri su portanan un biaha mas pa nos fundacion, esaki ta e di 3 aña consecutivo. Y sigur sin laga afo nos sponsornan cu ta haci tur esaki posibel y cu semper ta brasa habri pa yuda nos fundacion na cualkier momento cu nos acerca nan. Esaki sigur ta MIPA, WEB Aruba NV, Fundacion Jourainne Arends, MoMax Trainings & More, Eliyth Tech, Pelican Adventures, Wegenbouw, Albo Aruba, Land Seair Transport, Aruba High Maintenance, KimJen Construction, Andina Icey tur demas sponsor y persona incluyendo famia cu ta hopi pa menciona. Cada florin di contribucion ta yuda.
Un danki sigur tambe na Pos Chikito Rumshop cu mesora tabata dispuesto pa habri suportanan pa ricibi e bikernan. Danki special na Fundacion Volunteer Motor Unit Aruba cu tambe t’ey semper durante nos ridenan pa tene nos sigur riba e careteranan di nos isla pa asina nos por core sin ningun preocupacion. Y nos no por lubida tur e clubnan di biker di Aruba cu ta di gran sosten pa nos fundacion. Masha masha danki di curason na boso pa boso sosten y apoyo di semper y nos ta spera di conta cu boso pa hopi aña mas. Pa finalisa tur hende lo por bishita nos pagina di FB y Instagram pa haya mas informacion di Fundacion MiJu.