Na final di aña escolar 2021-2022 no menos cu 28 studiante na IPA a logra haya nan diploma di Bachelor Papiamento. Entre e studiantenan di Bachelor Papiamento tin algun cu na diferente ocasion durante nan estudio a duna un man na Fundacion Lanta Papiamento. FLP ta masha gradicido na Elliënne Riatiga, Sergio Winterdal y Josephine de Windt pa nan bunita sosten na varios actividad di e fundacion.
Tambe na diferente otro scol na Aruba na nivel di MAVO, HAVO y VWO tin un grupo di studiante cu a ricibi nan diploma incluyendo Papiamento como un di e materianan cu nan a scoge.
E graduadonan nobo di Bachelor ta trece un crecemento di e grupo di docente di Papiamento, algo hopi necesario pa Aruba. Di otro banda e studiantenan cu a scoge Papiamento como materia den e otro nivelnan ta prepara pa bon uzo di Papiamento den cualkier trabou cu nan eherce na Aruba, sea awor of den futuro despues di mas estudio sea na Aruba of den exterior.
Fundacion Lanta Papiamento ta manda palabra di felicitacion y gratitud na tur e graduadonan. Cada graduado, cu su preparacion, por aporta na desaroyo y bon uzo di nos idioma Papiamento. Den nos comunidad multilingual ta importante pa mantene bon uzo di nos idioma natal banda di uzo di otro idioma uza na Aruba.
Bon dominio di propio idioma ta un base fuerte pa siña domina mas idioma. Esaki ta e principio y base tambe di enseñansa multilingual, cu banda di Papiamento ta ofrece for di trempan tambe les di Hulandes, Ingles y Spaño como materia (vak) banda di Papiamento como idioma di instruccion. Bon dominio di diferente idioma ta habri caminda pa nos muchanan/studiantenan riba tereno di comunicacion, estudio, trabou, comercio y hopi mas.