ORANJESTAD,Aruba
FLP a publica riba dia di Derecho di Mucha, esta dia 28 di november 2019, un articulo, tocante Derecho di mucha relaciona cu nos idioma Papiamento y di e desaroyonan politico riba tereno di enseñansa.
Den e articulo menciona tin un parafo cu ta analisa e desaroyo negativo di un eventual MAVO/HAVO/VWO cu tin dos idioma stranhero, Hulandes y Ingles, como idioma di instruccion. Tambe ta cuestiona e echo cu ta pone e scol aki den man di Stichting Onderwijs Combina cu ta maneha e scol elite De Schakel cu ta cay bou di maneho di enseñansa y inspectoria Hulandes. Ademas FLP a cuestiona den e articulo ey, cu Minister di Enseñansa, Ciencia y Desaroyo Sostenibel ta hustifica e decision aki solamente cu argumento externo y no cu argumento pedagogico cientifico cu ta tene cuenta cu e derechonan di e alumno. E decision infunda aki ta basa riba un documento cu DEA a traha riba instruccion di e propio minister. E documento aki ta ‘Adviesnota: Taalbeleid voor een nieuw traject in het AVO’ di september 2019 cu ta un nota di conseho cu ta duna tres modelo pa AVO. Pero ta obvio, cu e nota aki no a keda discuti y no a haya su elaboracion. E no ta completo. P’esey pa FLP ta incomprendibel y inaceptabel cu, den un conferencia di prensa (7-11-2019), minister di enseñansa a presenta e prome opcion di e conseho aki como un decision.
Dicon Minister di Enseñansa, Ciencia y Desaroyo Sostenibel no ta sigui insisti pa e modelo di enseñansa bilingual Papiamento y Ingles? Dicon no ta traha hunto cu Fundashon Skol Humanista di Curacao pa medio di Skol Avansa Integra Humanista (SKAIH) cu semper tin bon resultado y cu tin experencia den enseñansa bilingual Papiamento-Ingles na nivel preuniversitario (MAVO/HAVO/VWO) y cu conoce nos contexto Caribense? Con ta tene cuenta cu meta di desaroyo sostenibel 4 (SDG 4) di UNESCO, cu ta pidi pa tene cuenta cu idioma materno di nos hobennan den scol? Esaki minister mes ta enfatisa den diferente discurso.
Lamentablemente ningun instancia no a reacciona riba e articulo aki di 28 di november. Sea no a les’e of no a compronde e seriedad di e topico trata. Tampoco no a honra e invitacion publico pa inicia un discusion tocante e topico aki.
Algun luna a pasa y den fin di siman ultimo FLP a tuma nota di un otro decision tristo di nos gobierno y specificamente di Minister di Enseñansa. Con ta posibel cu Minister di Enseñansa cu fanfaria ta declara 2018 Aña di Papiamento y awo ta bolter 180 grado y ta bin cu un maneho unda cu Hulandes y Ingles, dos idioma stranhero ta bay reina na e scolnan cu ta bay resorta bou di Stichting Onderwijs Combina subsidia pa gobierno? Con ta posibel cu den un crisis di salud y social-economico gobierno por tuma un decision asina importante cu ta toca cada persona na Aruba? Ya no por papia mas di colonialismo, pero si di neo-colonialismo cometi pa nos propio politiconan.
Resultado/logro di un siglo di enseñansa den un idioma straño cu no ta biba riba nos isla ta refleha den e siguiente cifranan tristo di nivel di educacion na Aruba (CBS 2010): educacion nivel abou 65.8% (basico 33.9/ LBO 17.3/MAVO 14.6), educacion intermedio 20.4% (HAVO 8.6%, VWO 0,7%, MBO 11.1%), educacion halto 13.0% (HBO 10.0%, WO 3.0).
E pregunta ta: Dicon sigui riba un pista desastroso di instruccion den idioma stranhero embes di siña nos alumnonan na Papiamento, den bon Papiamento? Asina nan por haya un base fuerte pa compronde loke nan ta siña y pa siña otro idioma stranhero como materia pa nan por sigui studia of traha.
E echo cu nos hobennan tin cierto conocemento di Ingles no ta haci cu nan por yega siña via Ingles, sin nunca a siña e nivelnan academico cu ta uza den buki di scol. Pa esey nan falta e base fuerte den nan propio idioma cu na Aruba ta ignora! E decision di minister a tuma nos y pueblo di sorpresa. A spera den e periodo aki envolvimento cu mayor, scol y esnan cu ta bringa pa un enseñansa apropia pa nos hobennan y dirigi pa fundacion Arubiano. Esey ta e maneho cu comunidad Arubiano a spera den 2020!
