ORANJESTAD,Aruba
Via media social Fundacion Lanta Papiamento a tuma nota di preocupacion relaciona cu introduccion di Scol Arubano Multilingual cu Papiamento como idioma di instruccion y preocupacion pa falta di acercamento holistico den enseñansa.
E berdad ta cu nos sistema actual di enseñansa na Aruba NO a yega ainda na tin un acercamento holistico, cuminsando na idioma di instruccion cu no ta Papiamento, idioma materno di gran mayoria di mucha na Aruba y pa e otronan e di dos idioma. Tampoco no tin efectividad den tur aspecto importante pa bienestar di alumno y maestro cu ta salvaguardia efectividad di enseñansa. Ademas nos maestronan falta pa haya sosten y guia pa adkiri e competencianan importante di e siglo aki pa por traha na un manera efectivo den e era aki. Pues un cos ta sigur: no ta un factor so ta conta pa logra enseñansa efectivo cu acercamento holistico.
Recientemente minister di enseñansa a declara cu 87% di e placa presupuesta pa enseñansa ta bay na paga salario; un suma grandi ta bay na pago di personal no directamente envolvi cu enseñansa. Poco ta resta pa innovacion di enseñansa na Aruba (mundialmente 75% ta bay na salario). Siendo parti importante di innovacion di enseñansa primario Proyecto Scol Multilingual, cu tawata e proyecto piloto pa enseñansa multilingual den scol primario, mester a draai cu e placa disponibel.
Ta mas cu logico cu pa cualkier innovacion maestro, futuro maestro y profesional envolvi cu innovacion y maneho di enseñansa, tur mester haya informacion y formacion necesario pa por ta parti di e innovacion cu ta implementa. Y naturalmente tur innovacion tin su gastonan na material esencial.
For di añanan 80 ta papia di enseñansa holistico. Sigur antes PRIEPEB y awendia SAM (Scol Arubano Multilingual) a y ta propaga factornan manera structura di cuido na scol, forma didactico activo, acercamento pedagogico constructivista, curiculo relevante, etc. como parti di innovacion di enseñansa primario, partinan imposibel pa neglisha. Enseñansa na Papiamento tambe logicamente por y mester ta holistico. Siendo idioma materno di gran mayoria di alumno, les y comunicacion na Papiamento ta mishi cu tur parti di e alumno su ser, tanto e parti di siñamento como e parti di desaroyo social emocional. Claro cu no ta idioma so ta conta, pero idioma sigur tin un papel hopi importante den e mucha su bida na scol y den bida. Tur investigacion cientifico ta mustra cu un mucha tin beneficio enorme na siña den su idioma materno. Anto nos maestronan y profesionalnan di mes mester haya bon preparacion pa ehecuta esaki.
Investigacion haci na Aruba mes entre studiante a demostra cu e alumnonan pa gran mayoria ta prefera instruccion na Papiamento. Enseñansa multilingual ta duna nan e chens di siña y compronde y sinti comodo pa expresa nan mes for di dia cu nan drenta scol. Banda di esey for di principio nan ta cuminsa familiarisa cu e tres idiomanan Hulandes, Ingles y Spaño pa despues siña e idiomanan ey na forma mas structura. E sistema multilingual bon ehecuta ta crea alumno feliz y spierto! Y nan mes kier esey. Pakico laga e escogencia di idioma di instruccion den man di directiva di scol? Pais Aruba, sosteni pa linguista y specialista di enseñansa bon prepara, por tin su maneho, mayor por tin otro escogencia, pero un directiva di scol no ta ni mayor (a menos di nan propio yiu) ni linguista.
Inversion den edificio y mantencion di scol ta algo cu sistematicamente no a funciona pa hopi aña. E tin di haber un sistema di subsidio anticua, falta di control pa garantisa responsabilisacion, bon uzo di fondo publico te na falta di control di renobacion di scol pa nan por dura hopi aña. Si tira un bista riba scol cu a caba di haya renobacion por observa tur e skernan cu t’ey bek mescos of pio cu con nan tabata. Sigur pais Aruba mester di un bon solucion pa e parti aki cu ta afecta enseñansa.
Laga nos permiti y respeta cada profesional cu ta haci lo miho di nan parti pa yuda Aruba haya un enseñansa efectivo, adecuado, comprendibel pa tur, cu tur cuido y sosten necesario pa bienestar di nos muchanan, nos hobennan
