ORANJESTAD, Aruba
“Ban papia cultura” ta un serie di 12 episodio cu fundacion Go Cultura ta presenta den e proximo lunanan pa pone enfasis riba e importancia di cultura y creatividad pa cu e desaroyo sostenibel di Aruba.
Amy Richards hunto cu Thaïs Franken lo ta e presentadornan y protagonistanan di e programa aki cu lo trece un variacion di topico interesante dilanti no solamente enfokando riba e relevancia di cultura, arte y creatividad como herment pa desaroyo di nos ciudadanonan, pero tambe poniendo enfoke riba nos Industrianan Cultural y Creativo cu ta posee oportunidadnan infinito pa nos isla y cu por crea un futuro hopi prometedor pa Aruba.
Durante varios programa, lo tin invitadonan presente cu tambe lo dialoga y intercambia idea cu Amy y Thaïs. Mas cu claro, e interaccion cu e televidente tambe ta importante durante e programa aki. Fundacion Go Cultura ta sigui cumpli asina cu su mision importante di pone cultura y creatividad na e curazon di e desaroyo sostenibel di Aruba.
“Ban papia cultura” ta forma parti di un programacion varia cu lo wordo presenta riba “Go Cultura channel”: un plataforma virtual caminda e televidente no solamente por disfruta di programanan en bibo, pero tambe lo por tin acceso “on demand” y cu e frecuencia cu e ta desea na cualkier programa presenta.
E estreno di “Ban papia cultura” lo tuma lugar diasabra 18 di juli pa 8’or di anochi riba e pagina di Facebook di Go Cultura of riba Go Cultura su canal di Youtube. Fundacion Go Cultura ta gradici e ekipo grandi di sernan creativo cu ta sosteniendo y participando activamente na realizacion di e proyecto fantastico aki.
Nos ta invita bo pa “like” e pagina di Go Cultura pa asina keda altanto di tur nos proyectonan.