ORANJESTAD,Aruba
Ya ta varios produccion audio-visual cu Fundacion Go Cultura a presenta como iniciativa pa uni, inspira, y entretene nos comunidad durante e temporada di crisis aki, logrando cada bes un resultado positivo cu ta notabel na e reaccion, comentario y peticionnan cu continuamente e fundacion ta ricibi pa sigui presenta produccionnan diferente, varia y di calidad halto.
Den poco tempo di su existencia, Fundacion Go Cultura a bira un di e aliadonan mas importante di esnan cu ta forma e sector cultural y creativo riba Aruba. No solamente brindando apoyo financiero na varios proyecto, pero tambe demostrando sosten moral, compartiendo conocemento y experiencia pa asina varios proyecto por bira realidad y ta exitoso. Sirbiendo como un vehiculo importante pa continuamente sigui cu e concientisacion cu cultura y creatividad awor mas cu nunca merece di ta na e curazon di e desaroyo sostenibel di nos pais.
Cu e produccionnan audio-visual di e ultimo luna aki, un plataforma nacional nobo y hopi necesario a wordo crea pa expone nos talentonan y den e proceso valioso ey, logra varios meta importante cu ta entre otro: inspira, empodera, educa, uni y eleva nos pueblo.
E proximo proyecto special lo ta un homenaje musical y virtual dedica na tur nos mamanan cu ta inclui un elenco excepcional di nos artistanan. Esaki lo tuma lugar diasabra 9 di mei riba bispo di dia di mama, riba pagina di Facebook di Go Cultura, Edjean Semeleer, TeleAruba y Canal 22, tambe via canalnan di television TeleAruba y Canal 22. “Di nos, pa Ma” lo cuminsa pa 9’or di anochi.
Pues un invitacion cordial pa nos comunidad, specialmente tur nos mamanan, pa sintoniza y disfruta di tur nos artistanan cu lo presenta durante “Di Nos, pa Ma”. Gradicimento special na Digicel, High Performance Sound Stage and Lighting, Sharp Productions, Aruba Bank, Superfood Plaza, Telearuba, Canal 22 y tur esnan cu ta brindando nan aporte hopi valioso pa haci tur e proyectonan aki un realidad.
