Ya a cumpli 10 aña cu Transparency International a presenta e National Integrity System assessment” tocante e vulnerabilidatnan cu Corsou tin pa cu corupcion. E organisacion a publica un rapport impresionante na 2013 cu un lista di recomendacion cu medidanan dirigi. Un grupo di persona cu tabata envolvi na e momento di structura e rapport a tuma e decision di funda e movemento civil Fundacion Corsou Transparente despues di e publicacion di e rapport.
E grupo aki kier a evita cu e recomendacionnan di e rapport lo disparce den un lachi. Nos ta exactamente 10 aña despues. Na unda nos ta awe? Corsou Transparente lo pone atencion den e lunanan binidero na resultadonan i recomendacionnan for di e rapport di e tempo ey y lo tira un bista con nos ta progresa de e situacion actual. Awe nos ta cuminsa cu un repaso riba e resultadonan di e investigacion. Transparency International ta considera cu preveni i combati corupcion den un pais ta rekeri un enfoke integral. Ta trata di e interaccion di diferente actor institucional, nan actividadnan i e interaccion entre nan. For di e perspectiva aki, Transparency International a evalua 14 pilar crucial cu ta forma e paisahe institucional di Corsou (mira e cuadro adhunto). E investigacion a identifica tanto pilar fuerte como esunnan debil den e sistema di integridad nacional di Corsou. E rapport ta ofrece un enfoke profundo riba e resistencia i efectividad, di institutonan y diferente sector, den prevencion i combatimento di corupcion i promove transparencia i integridad.
Sistema di Integridad
E 14 pilar cu a evalua durante e investigacion ta inclui entre otro Parlamento, Gobierno, e sistema di husticia, instancianan gubernamental, instancianan cu ta atende cu ordo publico, partidonan politico, medionan di prensa y sector priva. Cada pilar a wordo evalua riba tres aspecto importante cu tin influencia riba e capacidad pa preveni corupcion: capacidad en total, gobernacion y procedemento interno y e cuadro general den e sistema di integridad en total. For di cada pilar, nan a mapeá tanto e marko legal y regulacionnan, como e implementacion den practica.
Pilarnan fuerte y debil
Na 2013, segun Transparency Internacional, e poder huridico, Ombudsman y instànshan di control y supervision a wordo identifica como pilarnan fuerte den e sistema di integridad di Corsou. Generalmente, e organisacionnan aki tabata considera confiabel, pero nan efectividad tabata wordo obstaculisa pa divinidadnan den otro pilarnan. Na otro banda, partidonan politico, sector publico y media a wordo identifica como pilarnan debil, cu tabatin un influencia negativo riba e sistema di integridad di Corsou. Un aspecto crucial cu a keda resalta tabata e falta di transparencia y responsabilidad cu partidonan politico tabatin. Financiamento di partidonan politico tabata wordo considera insufisientemente regula, cu a resulta den score nan abou den e topico di transparencia pa e pilar aki. Pa reestablece confiansa di publico den e proceso politico, a enfatisa e importancia di promove transparencia i cuentanan cla den financiamento di partidonan. Ademas, e investigacion a mustra e retonan di e sector publico tocante integridad.
E influencia fuerte cu e poder ehecutivo (Parlamento) tin riba nombramento i decisionnan di politica a wordo evalua como un obstaculo pa un bon funcionamento efectivo di e sector publico. Tanto un accion “hands-on” di e poder ehecutivo como un falta di accion, por limita e capacidad di e sector publico pa funciona eficazmente. Pa garantisa integridad den e sector publico, a recomenda pa atende e asuntonan aki. Un otro pilar cu segun Transparency Internacional mester a atende tabata medionan di comunicacion. E importancia di un prensa critico y independiente den denuncia abosonan y tambe informa publico, a wordo considera esencial. A enfatisa riba e necesidad di mas periodista (di investigacion) cualifica, e importancia di reduccion di dependencia di financiado priva y entrada di propaganda/promocion pa por garantisa independencia di medionan di comunicacion. Banda di e resultadonan tocante e partinan fuerte y debil, e rapport tambe ta menciona hopi vulnerabilidatnan den otro pilarnan, manera e base legal debil di e conseho electoral y e escasez di recursonan financiero den e servicio di polis y instancianan hudicial.
Recomendacionnan
Basa riba e resultadonan, Transparency Internacional a propone e siguiente cuater (4) recomendacionnan principal. Corsou mester ratifica cu urgencia e Convencion di Nacionnan Uni contra corupcion y desaroya un plan di accion pa garantisa implementacion y siguimento di e convencion aki. Tur sector den comunidad mester enfoca pa aumenta nivelnan di transparencia den nan actividad, prosedimentunan interno y fuentenan di financiamento. Partidonan politico, specificamente, mester atende esaki cu urgencia. Gobierno mester duna prioridad na financiamento y desaroyo di capacidad di instancia hudicial pa laga nan investiga y tuma accion riba caso cu ta ser presenta pa instancia di control y supervision. Mirando e rol general cu e sector publico ta representa, gobierno mester compromete su mes pa mas independencia y sentido di responsabilidad den e sector publico, siguiendo principionan di bon gobernacion y garantisa cu tur mecanismo interno pa duna cuenta y rason y promove integridad ta existi. E implementacion di e mecanismo aki mester wordo controla y sanciona caminda ta necesario.