Fundacion Bernadina Growell-Kock a yama un conferencia di prensa pa asina nan anuncia nan festival di canto pa e aña aki. E fundacion ta existi for di 2010 unda cu tabata un comision cu a bira un fundacion y ta haci actividad rond di e mama di cultura Bernadina Growell-Kock. Den e proceso a organisa diferente festival tambe a participa na diferente paradanan cultural, a manda diferente representante nan pa participa na reina di cultura y reina di folklore, pero tambe a publica un buki conmemorativo cu ta trata bida y logronan di defunto Bernadina. Presidente di e fundacion Mervin Wyatt Ras ta duna di conoce cu e aña aki lo dedica e festival na Sr. Vicente Ras.
Fundacion Bernadina Growell-Kock ta hopi contento na esunnan cu ta duna apoyo na e fundacion tur aña y ta spera cu ta sigui haya mas sosten pa por sigui organisa tur e proyectonan pa asina pueblo keda responde grandemente manera e ta haci semper, pero na mes momento ta eleva nos cultura.
E aña aki ta priminti un biaha mas di ta un festival di calidad y tambe tin un bon cushina bon surti cu cuminda crioyo, sanger yena, pan cu spam , sopi , aroz con pollo y mas cuminda criyoyo. Ta haci un yamada na pueblo di Aruba pa asisti na e grandioso festival dia 3 di augustus cu ta diasabra awo unda cu lo cuminsa 8 or y ta spera cu lo termina banda di 1 or.
Segun Secretaria di Fundacion Bernadina Growell-Kock , Sra. Lena Orman Yarzagaray tin seis grupo y 17 participante. E festival ta dedica na Bernadina , pero e compositor nan di a canticanan ta compositornan Arubiano y na papiamento. E entrada ta costa solamente 10 florin y ta spera cu un y tur por bin y gosa di e festival.
Vice presidente di Fundacion Bernadina Growell-Kock Percy Jeandor ta hopi contento di e cantantenan y gruponan cu ta bin y ainda esunnan cu ta desea di participa ta bon bini, por yama na 5651145 cu por inscribe cera Secretaria di Fundacion Bernadina Growell-Kock , Sra. Lena Orman Yarzagaray.
E invitacion ta keda pa Aruba completo pa ta presente na centro di bario Brazil pa bin gosa hunto cu Fundacion Bernadina Growell-Kock y halsa nos cultura. Tambe na mes momento Fundacion Bernadina Growell-Kock a presenta e panja cu e fundacion lo bay cu ne den parada un bunita panja folklore cu ta identifica e aloe.
