Fundacion Alzheimers Aruba ta organizando un evento unda lo ta papiando tocante Alzheimer’s duna door di Drs. Melva Croes Yanez cu workshop tocante wandromento: Causanan, factornan di riesgo y tips pa famianan cu ta pasando di un manera of otro den un caso di Alzheimer’s aki na Aruba.
Awe nochi di 7’or pa 9.30 di anochi na Centro di Bario Lago Heights lo tin como tema “wandromento”, en conexion cu luna di Alzheimer’s y relaciona cu e 20 aña di existencia di Fundacion Alzheimers Aruba. Awe nochi lo splica e causa y riesgo di esaki y tips lo ser duna riba wandromento.
Fundacion Alzheimer’s Aruba y drs. Melva Croes-Yanez ta invita henter pueblo di Aruba pa bini y educa y informa nan mes mas tocante e tema aki, y ta wak e necesidad di concientisacion den e tema aki y e importancia di organisacion nan den e area aki na Aruba, cu tin como 5 caso di hendenan cu a ser perdi y nunca mas a ser haya na Aruba, door di esaki.
Esaki ta algo di lamenta y ta pesey ta purba concientiza pueblo den e area aki y tambe con alarmantemente e cifranan di persona cu un problema asina ta hisando na Aruba. Ta duna e informacionan aki pa asina desemboca otro aña den un congreso cu ta bai riba e aspecto legal y e parti di con pa actua ora un persona ser perdi.
Drs. Melva Croes-Yanez a amplia mas tocante e concientizacion di pueblo y a remarca cu aunke Fundacion Alzheimers Aruba ta cumpliendo 20 aña di concientizacion di pueblo riba diferente nivel y na diferente lugar, ainda tin hende cu no sa completamente kico Alzheimers ta y ta remarca con hendenan cu ta pasando den algo asina mas di cerca solamente ta pone hopi atencion y ta tuma e invitacion di concientisacionnan aki na serio.
Por ultimo Drs. Melva Croes-Yanez y fundacion Alzheimers Aruba ta invita pueblo di Aruba henter pa e presentacion aki. No ta importa si bo ta of no ta bibando esaki di cerca of no, ta mihor educa, preveni, y yuda prome cu lamenta. Ta pone enfasis pa tuma e tema aki na serio pa asina bo tambe por sa ki pa haci den e area basico y ta mas mihor equipa pa cualkier cos.
