Fundacion Alzheimer mester di boluntario

Durante COVID fundacion Alzheimer Aruba tabata tin un rol hopi importante, aunke cu e kere cu durante di e temporada di pandemia  cosnan lo calma esaki no ta e caso. Presidente di fundacion Alzheimer Aruba Melva Croes Yaniz ta duna di conoce cu durante di e COVID tabata e tempo di mas pisa.

Hopi hende den e temporada ey no por a atende dibiaha cu e cambionan cu a tuma luga durante di COVID na cas. E temporada aki a pone cu diripiente tur hende ta na cas y e persona cu tin uno of otro trastorno Neurocognitivo tambe ta na cas y ta bin diferente situacionnan cu ta presente unda cu diferente cosnan ta wordo mira mas lihe y ta wordo irita mas lihe paso depresion a hunga un rol den e parti aki tambe.

E personanan tabata cera den cas unda cu no tabatin ningun libertad y eingelijk un ser humano ta depende di su libertad. Na e mes un momento hopi abusonan tabata tuma luga unda cu hendenan ta perde pasenshi y na mes momento nan no por mas cu e persona cu ta biba cu nan den cas.

Fundacion Alzheimer no tabata por a yega na e casnan tampoco, pero si tabata haci hopi consulta na telefon y hasta via di Whatsapp tabatin consultanan cu ta tuma luga. E trabao pa yuda personanan cu un problema neurocognitivo riba su mes ta un bunita trabao, pero no ta tur hende por haci esaki.

E fundacion ta traha cu boluntarionan y esunnan cu ta interesa pa ta un boluntario di fundacion Alzheimer esaki ta posibel. Fundacion Alzheimer mes ta duna nan curso pa por sigui desaroya den e area aki pa yuda esunnan cu tin mester den e proximo 20 añanan.

Sinembargo lamentablemente hopi hende no ta interesa pa ta un boluntario cu tin un di e malesanan neurocognitivo. E tarea principal ta pa splica e hende nan kico ta e sintomanan y kico ta e manera cu e diferente trastornonan aki ta tuma luga. Sinembargo e no ta facil pa haya boluntarionan mirando cu tin hopi hende cu ta trahando y no tin e tempo pa nan bay sinta pensa, con nan mester trata machi y pachi. Segun Melva Croes Yaniz pa e fundacion ta hopi dificil pa haya boluntario , pero te ainda ta lora cu e tikinan cu tin. Esnan cu ta interesa semper ta welcome.