Ta 22 aña caba cu ta celebra e siman di cinta Teal na Aruba. E siman aki ta e siman cu ta sirbi como conscientisacion di nos comunidad riba topiconan di Alzheimer specialmente riba wandromento ( hende cu ta cana bay y perde)
Lamentablemente a papia hopi pero nada no a wordo haci cu consecuencia cu hopi cos no ta bay bon riba nos isla. Fundacion Alzheimer Aruba kier mira mas miho desaroyo den e partinan cu no ta bay bon. Den e siman di Cinta Teal tin diferente programa. Lo cuminsa cu un santo sacrificio di misa na San Nicolas na Misa Santa Teresita na San Nicolas Diadomingo awo 22 di september pa 10 or di mainta.
E tema principal di e aña aki di cinta Teal ta e proyecto di “Aruba Teal Alert” cu ta un proyecto cu ta data for di 2010 unda cu tin personanan cu a sali for di cas y a perde. Dies aña despues ta bolbe haci e proyecto aki debi cu e personanan cu tabatin antes a bay cu pension y tin hopi hende cu no ta activo mas, pero e trabou mester sigui. Segun presidente di Fundacion Alzheimer Aruba nos mester tuma e situacionnan aki na serio y duna e hende nan aki nan dignidad, pero tambe nan famia e sosten moral mirando cu semper ta keda un speransa cu nan famia ta bin bek.
Si mester mira e ultimo 5 añanan aki cu hende nan ta perde y tin diferente di nan cu nunca mas a keda localisa, Fundacion Alzheimer tin 5 hende te na unda cu nan sa cu ta perdi y cu nunca mas a haya nan, pero por compronde cu tin mas cu 5 hende perdi riba Aruba cu nunca mas a localisa nan.
Loke ta importante ta pa preveni situacionnan asina, for di 2010 a cuminsa cu un sistema di GPS pero e tempo ey no por a sigui cu ne debi cu e tecnologia cu tabatin mester di dje no tabata existi e tempo ey ainda. E situacion aki a pone cu mester a bandona e proyecto piloto di GPS. (Maude-rock GPS Project)
Awor lo cuminsa cu un otro proyecto unda cu ta busca personanan cu ta interesa pa forma parti di un curso pa nan wordo certifica. E curso lo tuma luga dia 26 ,27 y 28 di September proximo. E curso ta solamente pa 40 persona cu ta interesa y cu kier ta certifica pa e parti aki.
Na Aruba tin un grupo grandi cu ta interesa, pero tambe tin gruponan di exterior cu ta interesa pa haci e curso aki. Esunnan cu ta interesa por yama libremente na 5928416 of 5921430.
E curso ta specialmente pa personanan cu ta interesa cu na momento un persona perde cu nan por ser yama y activa pa asina e buskeda cuminsa. Hopi biaha na momento cu un persona cu un Trastorno Neurocognitivo, depresion, autismo, personanan cu adiccion na remedi perde e buskeda cu ta tuma luga ta laga hopi di desea.
Tampoco no por bay steun riba polis pa haci e parti di e trabounan aki tampoco debi cu e no ta un tarea di polis. E polis tey pa investiga y despues di 48 of hasta 24 ora e polis nan por actua.
Sinembargo na momento cu bo ta certifica cu bo ser yama e grupo por cuminsa busca debi cu cada minuut ta conta na momento cu un persona cu Trastorno Neurocognitivo perde.
