Federacion di Trahadornan di Aruba (FTA) ta di celebracion. Presidente di Federacion di Trahadornan di Aruba (FTA) Hose Figaroa cu hopi alegria y cu un honor grandi ta anuncia cu FTA ta celebra su di 60 aniversario. Pa 6 decada a sa di para hunto defendiendo husticia social y derechonan di e clase trahado. Awe 22 di Juli no solamente ta conmemora e logronan di pasado pero tambe ta confirma compromiso na e balornan duradero cu a guia FTA den futuro.
Dia 22 di juli 1964 cu ta net 60 aña pasa 5 compañero cu ta Wijkie Maduro, Fefe Bareño, Chinto Diaz, Rufo de Cuba y Rosendo Colina a bini hunto cu un vision comun. E cinco personanan aki tabata ambiciona pa un mundo den cual trahadonan ta keda trata cu dignidad unda cu salarionan digno y bon condicionnan di trabou no tabata simplemente un aspiracion pero un realidad.
E curashi y determinacion a forma e fundeshi di cual FTA a keda construi. E cinco personanan aki a realisa cu forsa ta resultado di unidad y por medio di esfuersonan colectivo a cuminsa un movemento cu pa semper a cambia e mundo laboral na Aruba.
Durante añanan sindicato FTA a confronta hopi reto y FTA a haya su mes cu oposicion y adversidad, pero semper FTA a sa di a surgi mas fuerte. E victorianan di FTA semper tabata e resultado di lucha duro y determinacion. Tanto Wijkie Maduro, Fefe Bareño, Chinto Diaz, Rufo de Cuba y Rosendo Colina a haci impacto grandi riba bida di un cantidad grandi di trahadonan y nan famia. Para pa pago husto ta percura pa un entorno di trabou sigur di demanda beneficionan di salud ta exigi siguridad di trabou.
Segun Presidente di Federacion di Trahadornan di Aruba (FTA) Hose Figaroa semper a sa di ta na vanguardia di e movemento laboral, nos trayecto a wordo marca pa logronan significante unda cu a sa di negosha acuerdonan cu cierto normanan di e industria. Den e transcurso nan di aña FTA a sa di reuni, marcha y protesta unda cu asina a pone e voz di FTA resona duro y cla. Tambe a participa den dialogonan importante cu dunadonan di trabou y gobernantenan unda cu ta defende legislacion y regulacion cu ta proteha derechonan di trahado. Cada logro cu FTA tin ta testimonio di e compromiso y solidaridad.
Sinembargo Presidente di Federacion di Trahadonan di Aruba (FTA) Hose Figaroa no ta celebra e logronan di pasado pero tambe ta un momento pa wak dilanti pa asina imagina e futuro cu nos kier construi hunto, e mundo di trabou ta cambiando rapidamente cu tecnologia nan nobo y industrianan den evolucion.
Segun cu ta nabega e cambionan e mision di FTA ta keda mes un cos pa proteha y mehora e derechonan di e clase trahado. Nos mester sigui di ta vigilante, innovativo y resiliente, nos mester adapta na retonan nobo mientras nos ta keda fiel na e principionan di FTA cu ta central. E union ta e forsa di mas grandi segun ta para pa salarionan husto, luganan di trabou sigur y oportunidadnan igual. Mester percura cu e voz di trahado keda scucha den empresanan cerca di gobernantenan y den organonan legislativo di nos pais.
Na mes momento nos mester recorda cu FTA no ta dies un organisacion e ta un comunidad, un famia cu ta keda teni hunto door di balornan comparti y respet mutuo unda cu mester sostene otro, halsa otro y para solidario cu tur trahado, esaki ta conta pa tanto e miembronan di FTA y e clase trahado general.
Presidente di Federacion di Trahadornan di Aruba (FTA) Hose Figaroa ta duna di conoce cu e forsa ta sinta den e diversidad y hunto por supera cualkier obstaculo. FTA ta den celebracion di 60 aniversario y na mes momento ta honra esunnan cu a bin prome cu ta esunnan cu a pone e base cu awe tur esunnan cu t’ey ta disfruta di dje awe.
Tambe ta celebra cu tur e miembronan di FTA pa nan dedicacion y trabou duro cu a haci e dia aki posibel. “ Bo compromiso y pasion ta e forsa nan impulsor tras di e exito di FTA continuo “
Na final Presidente di Federacion di Trahadornan di Aruba (FTA) Hose Figaroa ta reafirma e promesa pa e lucha pa husticia pa mantene e dignidad di labor y pa sigura cu cada trahado ta keda trata cu respet cu nan merece. Hunto lo keda construi un futuro caminda cu e derecho di e trahadonan ta keda proteha y nan contribucionnan lo wordo balora. “ Den union semper lo tin forsa”
