E prome barco di fruta y berdura lo yega Aruba di Venezuela dialuna awo. Desde 1 di Mei 2023, Gobierno di Aruba a habri e frontera maritimo cu Venezuela y dialuna awor, dia 5 di Juni, e prome barco lo yega Aruba cu 15 ton di fruta, berdura y otro mercancia. Cu esaki ta habri e posibilidad di por importa fruta y berdura y otro mercancianan na prijsnan hopi mas barata for di Venezuela yudando asina pa rebaha costo di bida.
Prome Minister Evelyn Wever-Croes a indica di ta consciente cu e proceso aki a dura un poco largo pero ta motibo cu Gobierno a enfoca na bin cu un sistema cu ta traha den bienestar di Aruba y cu ta safe. Pa siguridad a pone varios condicionnan riba mesa, cu den pasado a traha positivamente pa pais Aruba. Gobierno ta spera cu e mesun condicionnan aki lo traha un biaha mas yudando asina pa combati e costo di bida halto cu tin na Aruba actualmente.
Lamentablemente na Aruba mayoria producto ta importa y cu esaki ta bin e inflacion tambe. Pa e motibo aki ta importante pa sigui busca alternativanan pa importa productonan mas barata via trafico maritimo. Pa loke ta trata trafico aereo, esaki ainda ta satus quo. Gobierno ta trahando riba un analysis di e riesgonan pa mira kico ta locual cu mester tuma luga, den cierto casonan mester cambia ley of proceduranan prome cu por yega asina leu na habri e frontera aereo.
