Frakshon di MFK ku asombro a tuma nota ku tin diferente empleado públiko e luna aki a keda amargamente sorprendí ku e echo ku nan a sakrifiká bastante di nan oranan liber pa duna di nan parti pa asina garantisá e servisio di e aparato gubernamental di Pais Kòrsou, pero na momento di a risibí nan pago a tuma nota ku nan no a risibí nan pago di “overtime”.
Mirando e echo ku esaki a krea hopi desgusto i mal kontentu serka e empleadonan públiko, sigur den e organisashonnan vital ku ta traha 24/7, frakshon di MFK no por tapa wowo pa e problematika aki, motibu pa kual konforme artikulo 96 di Reglamentu di Ordu di Parlamento di Kòrsou, miembro di Parlamento pa Frakshon di MFK, Ramón Yung tin e siguiente preguntanan na Minister Martina.
- Di lokual suskrito a kompronde di diferente empleado públiko ta debí na aplikashon di un sistema nobo di pago, no por a paga “overtime”. E informe aki ta kuadra ku realidat?
- Tambe suskrito por a kompronde ku no a paga pa motibu di un supuesto “machtiging” ku ministernan no a entregá na tempu. Esaki ta kuadra ku realidat?
- E informashon ta kuadra ku SSO a bai riba un sistema (aplikashon) di pago nobo?
- Ta bèrdat ku e sistema nobo a kousa problema pa ku pago di salario básiko di e personal den e aparato públiko?
- Minister por informá ta kuantu persona no a kobra nan salario?
- Minister por informá ta kua empleado públiko òf empleadonan públiko di kua entidat no a kobra “overtime” huntu ku nan salaris di februari?
- Minister por informá ta ken ta esun responsabel pa pago di “overtime”?
- Kon e proseso pa pago di “overtime” ta kana normalmente?
- E informashon ta kuadra ku a stòp pago di “overtime” pa e personal den schaal 10 bai ariba di un forma abrupto?
- Tin un indikashon kuantu empleado públiko tin ku ta riba schaal 10 bai ariba?
- Kual kriteria tabata apliká anteriormente, ku tin empleado públiko riba schaal 10 ku tin años ta kobra “overtime”?
- Un empleado públiko ta verwacht di risibí su pago di “overtime” e siguiente luna ku el a traha esaki. A informá e empleado públiko na tempu ku lo NO paga “overtime” mas na personal riba schaal 10?
- Ku a informá e personal, ki dia a indiká esaki na e personal?
- Si a hasi esaki por eskrito, posibel ku por suministrá un kopia di e komunikado òf e forma ku a komuniká un ke otro ku e personal?
- Si kier eliminá pago di “overtime”, dikon no a hasi esaki di un forma gradual?
- No ta un sekreto públiko ku e aparato gubernamental ta ‘onderbezet’. Despues di e proseso di VVU, esaki ta aun mas bisto. Ki maneho ta bai hiba pa esnan ku no a haña “overtime” pagá?
- Si dado kaso minister ke apliká un sistema di duna “time-back”, ki maneho minister ta bai hiba pa garantisá ku servisio na pueblo ta keda optimal mirando e falta di personal ku tin aktualmente den e aparato publiko?
- Ki dia e aplikashon nobo pa pago di “overtime” lo ta operashonal?
- Ki maneho minister a hiba of ki solushon minister tin pa garantisá ku e fayo di pago di “overtime” lo no tuma luga mas?
- E informashon ku no a entregá “machtiging” na tempu ta kuadra?
- Si ta asina. Na ki momentu minister a tuma nota ku diferente ministerio no a manda nan “machtiging”?
- Kiko ta e motibu ku minister no a manda un rekordatorio na e diferente ministerionan pa asina evitá ku no por a prosesá e pago di “overtime” na tempu?
- Segun e rapòrt di Kontrolaria General, Minister tin pensá di hasi un kambio den lei di manera ku e personal den schaal 10 bai ariba lo por kobra “overtime” den futuro a base dje kambio di lei?
- Teniendo kuenta ku tin empleado públiko ku a traha “overtime” den luna di febrüari kaba i ku lo mester kobra esaki den luna di mart. Minister ya a pensa riba un formula kon pa kumpli ku e pago di “overtime” pa luna di mart próksimo?
1 comment
[…] Source link […]