Frakshon di Movementu Futuro Kòrsou ta kla pa trata eliminashon dje lei di
rekorte di 12.5% pa ámtenarnan. Parlamento ya a trata e lei aki durante un reunion di Komishon
Sentral. Movementu Futuro Kòrsou a sali for dje punto di bista ku tur frakshon den Parlamento
lo tabata di akuerdo pa eliminashon dje lei di rekorte di 12.5% riba entrada di ámtenarnan i pa
aselerá e proseso, ku tur frakshon lo por a bai di akuerdo ku un “blanko verslag”.
Sinembargo, frakshon di PNP no tabata di akuerdo pa bai un “blanko verslag”, komokiera ku nan
tabata deseá di hasi algun pregunta. Na opinion di Frakshon di MFK, frakshon di PNP a hasi
algun pregunta, simplemente ku e fin pa alargá e proseso, hala kakiña i evitá ku ámtenarnan lo por
logra kobra loke ku nan tin derechi riba dje den luna di desèmber próksimo, pasó ta e èks
minister di PNP mes tabata enkargá pa atendé ku eliminashon dje lei aki.
Frakshon di MFK, apesar dje echo ku a purba na trese tardansa den e proseso pa kaba atendé e
lei aki, ta kla pa trata e lei aki den reunion públiko, di manera ku ámtenarnan den luna di
desèmber awor lo por disponé di entre otro nan indeksering of “lùmpsùm”.
Den kaso di MFK, “anzue no mester ta grandi pa kue piská, pasó un kurason humilde no sa
broma”. Pues frakshon di MFK di su parti ta sumamente positivo i ta keda kere ku mala fe hamas
por gana buena fe.
Frakshon di MFK sigur ke gradisí personal di griffie di Parlamento, ku ayera mes ya a terminá ku
e “verslag” di manera ku esaki por a bai pa gobièrnu, di manera ku pronto lo por trata e lei aki
den un reunion públiko. Amtenarnan por ta mashá trankil, pasó teniendo kuenta ku e urgensia pa
atendé e lei aki, frakshon di MFK tambe ta hasi un apelashon na Presidente di Parlamento pa riba
un término hopi kòrtiku, asina ku gobièrnu kontestá e preguntanan, fiha un fecha pa tratamentu
dje lei den un reunion públiko. Pasó MFK su kurason ta sigui bati pa e ámtenarnan tambe.
Frakshon di MFK ta kla pa trata eliminashon dje Lei di rekorte di 12.5%
