Frakshon di MAN ta urgi Partidonan MFK i PNP pa publiká e karta fechá dia 5 di mei 2021 ku a ser dirigí na sr Knops

Resientemente frakshon di MAN a tuma nota di un karta ku kontesta di sekretario di estado sr Raymond Knops a manda pa lidernan di Partidonan di MFK i PNP. Basa riba e kontesta di Sr. Knops riba e karta di 5 di mei último nos por konkluí ku partidonan MFK i PNP kual ta e partidonan ku lo bai forma e gobièrnu nobo lo no ke sigui  mas ku e trayekto di COHO. Reakshonando riba esaki sr Knops a indiká di lo no sigui duna sosten finansiero mas na pais Kòrsou i ku lo mester kuminsá paga e debenan di e sosten finansiero den kuadro di COVID bek na aprel 2022. E karta aki a trese un intrankilidat enorme den nos komunidat sigur mirando kuantu hende ta risibí sosten di entre otro NOW regeling, i tambe likides na nos presupuesto pa por paga entre otro salario di ámtenar. Lokual ku nos a keda straña di dje ta ku e karta di kual sr Knops a reakshoná riba dje fechá dia 5 di mei 2021 su kontenido no ta konosí serka nos pueblo. Partidonan ku a indiká den nan akuerdo di gobernashon ku lo sòru pa un gobernashon di pueblo, pa pueblo i huntu ku pueblo di Kòrsou, ta pueblo su bùrt no por keda sorprendí ku un karta asina sin sa kiko ta e kontenido ku a pone ku sr Knops a reakshoná di e forma aki. Pa e motibu aki frakshon di MAN ta urgi lidernan di partidonan MFK i PNP pa publiká e karta fecha riba 5 di mei 2021 pa asina pueblo por sa kiko ta kontenido di e karta. Nos ta spera ku esaki lo sosodé mas pronto posibel mirando ku e partidonan a indiká di lo ta transparente ku pueblo di Kòrsou