Ultimo a sali informashon di komportashon i aktitut di Minister di Finansas sr. Javier Silvania.
E aksusashon ku a bini dilanti di intimidashon i humiyashon na boka di trabou dor di e minister kual nos ta konsidera akusashonnan hopi fuerte.
Pa Frakshon di MAN dignidat humano ta sentral, kaminda ku semper nos ta sali derechonan humano i laboral. Segun nos leinan i tratado di ILO ta nos deber komo Parlamentario i Gobièrnu pa defende bienestar di nos empleado publikonan.
Skuchando lidernan sindikal ku ta representá empleado publíko, nos ta kompronde ku e situashon laboral ta tenso pa e manera kon minister ta atende ku empleado publiko. Siman ku a pasa a sali na kla ku dos miembro di LBD pa motibu di un komportashon no apropia i trato di Minister Silvania a disidi ku nan no ta traha mas pa e minister. E situashon aki a resultá den 3 rapòrt riba komportashon no desea di e minister ku a keda traha pa dokumentá loke a bin ta pasa ku dos miembro di LBD ku tabata enkarga ku seguridat e minister.
Pa nos frakshon di MAN esaki ta algu hopi serio mirando e ròl (e funshon) importante ku un di Minister di Finansas tin den gobernashon i awor aki aun mas den e situashon kritiko finansiero unda e Minister di Finansas sr. Silvania ta e kara den e proseso di negosashonan ku Hulanda aktualmente.
Mirando e akusashonan fuerte ku a bini ku ta empleado publíko ta bira viktima di humiashon i intimidashon nos tin e deber atende ku esaki di forma serio i urgente.
Den kuadro di esaki nos ta manda un kopia di e karta pa Minister di Gobernashon, Planifikashon i Servisio Publíko, komo e minister ku ta responsabel pa atende ku e posishon huridiko di tur empleado publíko I ku ta representa gobièrnu den CGOA.
konforme artikulo 96 di reglamento di orden di Parlamento nos a hasi e siguiente pregunta na Gobièrnu:
- Minister Presidente ta na altura di e informashonnan riba komportashon di Minister Silvania?
- Komo lider di pais, Minister Presidente i Minister di BPD, kon ta bai atende ku e situashon aki?
- A inisia un investigashon riba e susesonan di intimidashon?
- Ta berdat ku e 3 rapòrtnan aki ta serka Minister di Hustisia ?
- Kon Gobièrnu ta bai sòru pa proteha e empleado publíko kontra aktuashonnan i komportashon di Minister Silvania?
- Ta berdat ku Minister di Enseñasa sr. van Heydoorn a papia ku e empleado publikonan enkuestion?
- Basa riba kua outoridat e Minister di Enseñasa ta tuma kontakto ku e empleado publikonan aki?
Frakshon di MAN ta kontra kualke forma di abusu di poder pero tambe kontra intimidashon di hende. Diginidat humano pa nos ta sentral i tin ku reflehá den tur organo di nos pais.
Nos ta spera ku mas pronto posibel Minister Presidente komo lider di gobièrnu atende e situashon aki pa esaki no mester sigui mas.
