Resientemente Frakshon di MAN a tuma nota di e publikashon di e dekreto real basa riba e opheshon ku Gobièrnu di Kòrsou a entrega riba e aanwijzing risibí dekretá 12 yüli 2020. E aanwijzing tabata riba puntonan di e norma finansiero ankra den Rijkswet Financieel Toezicht. Gobièrnu di Reino a duna aanwijzing riba 3 punto kual ta kompensashon di 112 mion riba presupuesto di 2019 i kompensashon di 169.5 mion riba presupuesto di 2017 i 2018.
Riba e maneho finansiero kual último añanan tabata un reto pa Gobièrnu di Kòrsou mirando e situashon ekonómiko kual ta redundá den bahada di entradanan ku Gobièrnu ta risibí den kaha pa medio di impuesto.
Pa atendé e retonan aki Gobièrnu di Kòrsou a tuma diferente medidanan interno pa logra baha mas tantu gastu ku ta psoibel riba presupuesto di Pais Kòrsou. Banda di esaki Gobièrnu di Kòrsou a tuma riba dje pa atendé e retonan di forma integral garantisandó un desaroyo duradero pa nos komunidat. E manera pa atendé e retonan a yega na firma un akuerdo ku Hulanda (onderlingeregeling) kual a yega na Groeiakkoord e tempu ei.
E meta di Groeiaakoord tabata pa yega na un finansa públiko na òrdu pero tambe mehorá e klima di invershon kual mester ta un kresementu ekonómiko. E akuerdo aki entre Hulanda i Kòrsou ta e motibu bálido dikon e aanwijzing pa Raad van State no tabata tin motibu pa drenta na vigor. Esaki mirando ku ya kaba a yega na un akuerdo kon ta bai traha huntu pa mehorá finansas publiko i tambe e aparato gubernamental. Último un di e kondishon ku Sekretario di Estado Knops a bini kun’e ta pa eleminá e akuerdo di Groeiakkoord. Pa ku esaki Gobièrnu a keda para riba e punto kual ta e akuerdo aki. Ku lo mester a trese kun’e ayudo pa mehora nos aparato i finansa públiko pero tambe un fiansa di èkstra di 180 mion pa invertí den nos ekonomia i tambe nos enseñansa.
Frakshon di MAN kièr felisitá Gobièrnu di Kòrsou pero spesialmente minister di finansa sr Kenneth Gijsbertha pa e trabou pero e lucha inkansabel huntu ku su tim a hiba den e proseso di apelashon pa logra un resultado positivo pa Kòrsou. Un trabou basa riba resultado i akshon tuma pa logra un futuro duradero pa nos pais.