Frakshon di MAN : Presupuesto 2022 no ta reflehá adelanto di nos pueblo

Motibu pa Frakshon di MAN vota kontra di e presupuesto den parlamento djabièrnè último

Frakshon di MAN den tratamentu di presupuesto djabièrnè último a bai kontra pa motibu  di diferente aspekto den e presupuesto ku no ta reflehá adelanto di nos pueblo. Banda di e echo ku CFT mes ta indiká den e presupuesto ku esaki no ta òrdu, e presupuesto ta kontradesí e maneho di e gobièrnu i sigur e nota di kambio ku nan a presentá.

Motibunan kardinal pa MAN ta ku e gobièrnu aktual ta purba pa haña entrada dor di oumentá kosto di bida i kòrta den kalidat di kuido di nos hendenan. Den presupuesto gobièrnu a pone di bai kobra “invoerrechten” riba gasolin. Esaki ta algu ku nunka ántes nos a konosé. E kobransa aki ta nifiká ku lo bini un komponente  mas di gastu  den preis di kombustibel. Esaki lo tin komo konsekuensia ku kosto di bida lo subi.

Otro punto ku pa Frakshon di MAN ta motibu pa vota kontra e presupuesto ta e kortenan den salubridat ku Gobièrnu kier trese ku ta bai afektá kalidat di kuido di nos pueblo.

Gobièrnu ta presentá den su nota di kambio korte den:

1. AOV 10% pa e personanan ku ta biba den eksterior, kaminda tin un veredikto di korte ku ta indiká ku esaki no por
2. Kita “steunkoussen” i material di rehabilitashon
3. Kita fisioterapia, esaki ta keda pa malesanan króniko so
4. Kita transplante di kurason, igra i nir. E pashènt mester bai biba na un otro pais.
5. Kita sikólogo pa mucha.

Tur e medidanan aki lo drenta na vigor  yüli 2022 .

E medidanan aki nos ta konsiderá ku no ta na fabor di pueblo. Nos pueblo meresé i tin derecho riba adelanto i un kuido di kalidat i aksesibel.

Oumento di OB na un tarifa di 7% i eliminashon di e dedukshon di 50% di OB na entrada, no ta sigur ku esaki lo wòrdu introdusí si òf no. Esaki debí ku minister den su presupuesto ta papia di esaki. Pero tambe den e konseho di CFT riba e presupuesto i su nota di kambio ta bini dilanti.

Frakshon di MAN a keda konsistente den su posishon riba e presupuesto, i ta di opinion ku esaki no ta reflehá adelanto di nos pueblo.

Tur e puntonan ariba menshoná tabata e motibunan prinsipal di Frakshon di MAN pa vota kontra  di e presupuesto 2022.