Frakshon Demokrat ta reakshoná ku asombro riba e kampaña ku Tourism Corporation Bonaire a lansa huntu ku Bonhata ku ta karga e slogan: ‘Turismo ta sexy’.
Na opinion di Frakshon Demokrat e slogan aki ta eróneo i ta puramente un strategia di markadeo pa aperentá algu ku no ta.
Pa realmente hasi e sektor di turismo atraktivo pa studia i traha, ta nesesario pa kuminsá sòru minimalmente pa lo siguiente:
1. Ofresé un salario digno, ya asina e trahadónan no mester traha dos òf tres trabou pa nan por kubri nan gastunan básiko;
2. Ofresé un areglo di penshun ya asina e trahadónan no mester sigui traha te na un edat avansá of asta te ora nan kai muri, pasobra di otro manera nan NO tin entrada pa kubri nan gastunan mensual;
3. Ofresé i kubri gastu di kuido di mucha, durante di dia, anochi i henter siman, ya asina e mayornan ku mester traha, sa ku nan yunan ta bon kuidá ora ku nan ta trahando;
4. Ofresé transporte (públiko) pa e trahadónan por transportá nan mes entre trabou i kas, no solamente durante oranan regular, pero tambe durante oranan iregular manera sigur ta e kaso den e sektor di turismo;
5. Ofresé estudio di turismo riba nivel di bachelor pa nos hóbennan, ya asina nan tambe por ehersé labornan den maneho i direktiva.
E intento pa stimulá mas hende lokal pa drenta sektor di turismo ta di apresiá, pero enbes di usa un slogan dudoso pa krea un imagen positivo, ta na su luga pa realmente hasi e sektor atraktivo pa asina hobennan por tin un karera eksitoso i un futuro briyante. E nifikashon ku a duna ‘turismo ta sèksi’ ta totalmente robes i no ta duna e impreshon di kiko kièrmen presisamente. Mas engañoso ta ku ke imponé un pensamentu riba nos lokalnan ku frankamente, no ta eksistí. Ta meskos ku e asuntu di ‘Blue Destination’, un nifikashon habrí, liber pa interpretashon. E difinishon di e palabra sèksi ta seksualmente atraktivo òf seksualmente eksitante. Pues nos di Frakshon Demokrat ta simplemente konkluí ku e slogan no ta kuadra.
Mientras ku e kampaña ta ‘bisa’ ku traha den turismo ta sèksi, e realidat aki na Boneiru ta ku e salario promedio den e sektor aki NO ta yega pa un adulto ku su famia kubri nan gastunan básiko mensual. Banda di esaki e trahadó den e sektor di turismo lo mester sigui traha te dia e muri, pasobra NO tin un areglo di penshun di trabou pa e sektor aki tampoko.
E ta realmente sèksi traha den un sektor ku no tin bo futuro na kurason? E ta realmente sèksi traha den un sektor ku oranan inregular pero transporte no ta regla? E ta realmente sèksi traha den un sektor kaminda posibilidatnan pa wòrdu promove na posishonan haltu, ta limitá? Boneiru a keda eksponé den eksterior komo un destinashon seksual? Ta realmente nesesario pa seksualisá un sektor manera turismo? Mester ta kuidadoso kon ta usa kada palabra i mas tantu tambe pasobra tur edat ta benifisiá i disfrutá di e sektor. Realmente kier enfoká riba seksualtidat enbes di formashon, futuro i transporte?
Frakshon Demokrat ta remarká ku kalidat den un sektor manera turismo bo NO ta alkans’é ku un slogan, pero ku apresio demonstrá den echos ku ta hiba e tarahadó dilanti, di manera ku e por biba un bida digno ku sufisiente tempu pa por rekreá ku su famia.
