Na MdR nos a keda risibí pa Danilo Christiaan ku ta e Manager na Parke Kultural Mangazina di Rei.
E biaha aki nos a bai pa kombersá ku Sr. Christiaan riba kultura en general i desaroyonan den e parke. Tambe nos a kombersá riba selebrashonnan di 25 aña Fundashon Mangasina di Rei na Desèmber 2021, Selebrashon 200 aña na 2024 di e edifisio di Mangasina di Rei i Selebrashon 500 aña di Rincon na 2027.
Anteriormente nos a bishita MdR kaba pa mira loke tin. No mas ku luna di Yanüari nos tabata di bishita na MdR ku un grupo di estranhero ku ta prepará pa nan eksámen di Naturalisashon.
Nos isla tin basta tempu kaba ku e mòto di Desaroyo ku mantenshon di Kultura i Naturalesa. Mantenshon di naturalesa a haña for di basta tempu kontenido i ta sigui desaroyá e kontenido aki den leinan i na maneho. Mantenshon di kultura na otro banda si no por konta ku un desaroyo di kontenido komparabel ku esun di mantenshon di naturalesa. Te ainda ta duna kultura muchu tiki atenshon.
Loke a bin dilanti den nos kombersashon ta ku pa kuminsá e definishon ku nos ta duna na Kkultura, ku mas bien ta nos Folklor esta muzik, baile, bistimentu, kushina ta un definishon masha limitá. Kultura ta nos manera di biba, e ta algu dinámiko basa riba nos norma, balornan i nos herensianan tantu tangibel komo intangibel.
Mester atendé ku kultura for di e punto di bista amplio aki. Pa asina por krea personanan kompleto ku sa di unda nan ta bini pa nan sa unda nan ta bai. Un aserkamentu integral pues. Kultura komo base di desaroyo di nos hendenan.
Pa logra esaki mester kuminsá pa bin ku un distinshon kla entre maneho i ehekushon. Un servisio di Gobièrnu ku ta deliñá i guia maneho anto ku institutonan/organisashonnan ku ta ehekutá i sostené ehekushon di esaki.
Sr. Crestiaan a splika di nan plannan komo MdR. MdR ta wordu desaroya riba 5 pilar ku ta esun:
- Ekspresivo pa fortifiká e identidat kultural i promové balornan di e área.
- Edukativo pa formashon kultural sosial. Traspaso di konosementu di nos grandinan.
- Ekonómiko pa diversifikashon di e produkto turístiko. Krea entrada i promoshon di produktonan lokal.
- Medio-Ambiente Tékniko pa stimulá bida di kunukero i apresio pa e área.
- Sosial pa stimulá partisipashon di nos komunidat.
MdR a krese i bira un atrakshon turístiko, un plataforma pa produktonan lokal, un sentro di edukashon. Pa esei e ta un estímulo pa desaroyo den e área.
MdR ke pone su eksperensia komo parke kultural i sentro di edukashon disponibel pa sigui desaroyá e área di Rincon.
Mirando e desaroyonan aki MdR por tin un papel sentral den mantenshon di nos kultura. Esaki mester keda reflehá tambe den e sosten di presupuesto ku MdR ta haña for di Gobièrnu. Pa un bon komparashon por kompará esaki ku loke naturalesa ta haña esta e asina yama “Nature Fee”. Ta bon pa opservá tambe ku; ku naturalesa nos ta konserva i ku kultura nos ta krea.
Pa loke ta trata e selebrashonnan nos ta kere MdR mes lo duna e tenshon nesesario na nan Selebrashonnan esta 25 aña di e fundashon i 200 di e edifisio.
Pa loke ta trata 500 aña di Rincon si nos ta kere ku mester bin muchu mas atenshon pa esaki. Tin aña kaba ku a kuminsá papia riba e selebrashon aki i a bira tempu pa kuminsá atendé di un manera mas konkreto ku esaki pa por selebr’é ”en grande”.
