Fraccion di PAR a tuma nota cu durante ultimo simannan personal di Warda Costa i KPC a registra diferente lancha cu a drenta nos pais di forma ilegal. Riba e lanchanan aki, banda di droga i arma a bin ta topa cu regularidad menornan di edad. Recientemente por a tuma nota cu un mucha di 5 aña tabata riba un di e botonan aki.
Esaki ta un desaroyo di preocupacion, specialmente mirando casonan di ‘traficacion i trata di mucha’ ta lantando cabes na diferente parti di mundo. Rednan cu ta saca muchanan for di nan pais di origen cu meta di prostitucion i/of trabounan ilegal.
Trafico di hende ta contra tratadonan di derecho humano i castigabel pa nos leinan. Gobierno mester haci tur posibel pa evita cu Corsou ta keda uza pa tipo di practicanan asina aki. Na aña 2021, Corsou a keda devalua na TIER 3, di TIP-Report. Esaki ta pone cu como pais, mester bay pone mucho mas atencion na traficacion di hende i e maneho cu Corsou ta hiba pa preveni esaki.
Den cuadro di esaki suscrito tin algun pregunta:
Cua ta e maneho cu Gobierno ta hiba na momento cu un menor di edad drenta nos pais di forma ilegal, tanto pa medio di lama como aire?
Cua ta e procedura, cu Gobierno ta hiba pa confirma e identidad di e mucha/hoben?
Con e refugio (opvang) di e mucha/hoben aki ta keda regla ? ( pa proteccion di e mucha i hoben, e pregunta aki por keda contesta den forma di ter inzage). Cuanto tempo ta e maximo tempo ankrá den e maneho cu un mucha/hoben por keda separa di su mayor òf ‘voogd’.
Si detecta caso di traficacion di mucha, cua ta e proceduranan cu ta keda enkaminá?
Minister lo por informa Parlamento durante e ultimo 3 añanan, cuanto investigacion a keda haci di traficacion di mucha, cuanto caso a keda confirma i hiba dilanti di corte di Husticia?
