Fraccion di MAN : Mester introdusí tèst di COVID 19 bèk pa biaheronan for di Hulanda /Oropa

Aktualmente nos ta tumando nota ku na Hulanda i tambe otro paisnan den Oropa, e sifranan di Covid 19 ta oumentando drástikamente.
Den kuadro pa fasilitá biahamentu entre Oropa i Kòrsou pa asina sigui stimulá ekonomia atraves di turismo, desaroyonan na Hulanda ta,ku a stòp e tèstmentu pa esnan full bakuná kendenan ta biaha di Hulanda pa Kòrsou. Ta ampliamente konosí ku esnan ku ta bakuna pa covid 19 tambe por keda kontagiá ku e vírus aki, i pasa esaki pa otronan.
Esaki ta trese kuné ku nos lo amplia nos rísiko pa ku e 57 mil hendenan ku no a bakuna den nos pais.  Míles di turistanan kendenan lo bishita nos isla por por katalisá kontagio pa e grupo aki i esnan bakuna, ku problemanan króniko di salú, mirando ku nan ta bini for di paisnan di riesgo haltu di Covid.
Kòrsou a bin ta kana i yega na mas di 93 mil hende ful bakuna, i komo tal nos sifranan tiki tiki ta kuminsá stabilisá pa loke ta e kantidat di kasonan nobo. Pues esaki lo ta un sla hopi duru pa nos hòspital i ekonomia si nos bolbe konosé un “pik”(subida) di kasonan di Covid 19 pa motibu ku turistanan for di Hulanda i Oropa.
Nos ekonomia interno i nos salubridat no por wanta ningun sla mas.
Den kuadro di esaki nos ta urgi Gobièrnu pa re- evaluá esaki i introdusí bèk e tèstmentu pa Covid 19 di e  mesun forma ku islanan BES ta hasiendo komo teritorio Hulandes.
Ekonomia ta importante sin mas, pero ekonomia no por bira su propio desgrasia kousando nos salubridat ku mas riesgo despues di asina tantu sakrifisio di hendenan i komersio lokal.