ORANJESTAD, Aruba
Den un carta dirigi na Presidente di Parlamento, como tambe tur gremio sindical y comercial, fraccion di AVP ta expresa su preocupacion cu Gobierno tin tur intencion di gobierno pa exonera CITGO di tur cargo. Tambe duna CITGO absolucion di tur responsabilidad pa medio di e ya menciona Termination Agreement. Haciendo esaki, esta termina e acuerdo cera cu CITGO na 2016 cu Land Aruba ta tuma over tur riesgo y responsabilidad. “E 16 miyon di dollar cu CITGO ta paga ta simplemente parti di loke nan debe na belasting,” asina miembro di fraccion di AVP, Sr. Richard Arends, a splika.
Segun e carta, intencion di Gobierno ta preocupa e fraccion di AVP masha hopi mes, pasobra e holding company di CITGO, cu ta ubica na Merca, a duna un garantia di US$ 150,000,000 pa cubri tur responsabilidad di e entidadnan di CITGO den caso cu e subsidiarionan no cumpli. “E posicion di henter e grupo ta masha solido pa por paga e debenan cu ta deriva di e garantia aki. Dia 30 di juni 2019 CITGO tabata posee US$ 1,36 biyon na cash. Ademas henter e grupo tin un exoneracion general di e Office of Foreign Assets Control (OFAC) pa por haci pagonan. “Debenan di belasting na nan turno nunca ta cay bou di cualkier exoneracion,” segun e carta.
E meta di e garantia tabata pa sigura cu Aruba por demanda e entidadnan di CITGO na tur momento en caso di no-cumplimento, entre nan debenan di belasting, huur, daño na medio-ambiente, gastonan di desmantelacion di e refineria. Segun fraccion di AVP ta algo nobo cu no tin un operador cu ta tuma over e responsabilidadnan. “Den pasado gobiernonan di Aruba di varios signatura semper a percura cu ta despedi di e operador bieu cu tur exoneracion y absolucion di e responsabilidadnan te ora tin un doño nobo cu ta para cla pa tuma over e gastonan di desmantelacion,” fraccion di AVP a indica den nan carta. “Loke cu e gobierno aki ta pidi di Parlamento ta algo iresponsabel. Sigur pasobra te ainda Aruba no tin un otro doño pa tuma over e trabounan di e refineria y terminal, cu ta para garantia pa e gastonan di desmantelacion.”
Segun fraccion di AVP, ta evidente cu gobierno ta haci mal uzo di e situacion di crisis causa dor di e crisis relacion cu corona pa den un tempo record pidi Parlamento un apoderacion sin ningun limite. Recientemente presupuesto di 2020 a wordo aproba cu un deficit di 1.3 biyon florin sin ningun sorto di control. Fraccion di AVP den PArlamento ta di opinion cu Parlamento di Aruba, como instituto, mester por keda funciona den tempo di crisis, pa por ehecuta e checks and balances cu ta impone y ta necesario pa asina por garantisa e derechonan di Staten como legislador. “E falta di transparencia ta e esencia di critica di Raad van Advies y di nos fraccion riba e concepto di ley.
Gobierno ta pidi un carte blanche pa CITGO wordo completamente exonera di su obligacion y responsabilidadnan sin cu nan hasi ningun tipo di pago of compensacion. Mientrastanto ta pasa cu tur riesgo y responsabilidad cu tur consecuencia finanaciero di e refineria, e terminal y operacion maritimo pa Land Aruba. E carte blanche aki ta bay en contra di tur principio di un sistema democratico, seguridad huridico y bon gobernacion.
