ORANJESTAD,Aruba
Miembro di Directiva di FPNC sra. Andrina Dirks ta splica cu FPNC tin mas di 11 aña trahando cu pobreza den nos comunidad, yudando un averahe di 150-200 famianan vulnerabel pa luna cu paketenan di cuminda. Pobreza no a cuminsa na maart 2020, e t’ey pa añas caba. Locual si a tuma luga na maart 2020 ta cu Aruba a drenta e corona-crisis cu a sakudi henter nos Pais y su hendenan. Como consequencia di e esaki e peticionnan di ayudo a aumenta masalmente cual a pone un preshon riba henter e sector social. Pa FPNC e ta nifica cu e total di ayudo cu a ser duna den henter 2019 cual ta alredor di 3000 pakete casi a wordo alcansa den 5 siman den 2020-den cual 2000 famia a ricibi ayudo di cuminda desde fin di maart.
Ta na su luga pa informa cu e pakete di cuminda ta consisti di comestibles cu ta wordo cumpra cada luna for di diferente companianan local. Tur otro producto entre otro pan, fruta y berdura fresco cu wordo ricibi como donacion ta wordo añadi (extra) den e pakete na e momento ey. Door di e situacion actual ta trahando cu hopi boluntario pa asina por yuda mas famia posibel cu tur e limitacionan cu por tin pero cu e mesun animo di semper. Awe e proceso di bidding riba e compra massal cu tin cu wordo haci a cuminsa y den esaki CEDE aruba como instancia independiente tin un rol pa percura transparencia den e proceso. Pa yega na e constelacion di e pakete a consulta cu sra Ebrina Curet di DVG pa asina por garantisa un pakete cu e nutricion basico y necesario pa sobrevivi un crisis. Cada pakete tin un balor alrededor di 250 florin. FPNC su meta ta (introduciendo e forma di registra directamente) pa alcansa un cantidad di 5000 pakete den e luna venidero.
A base di datonan colecta por informa lo siguente:
E percentage di e diferente constelacion di famia: 1-29%, 2-24%, 3-20%, 4-13% y 5 te 10- 14%.
Pa loke ta trata districtonan: Oranjestad-31%, San Nicolas-20%, Noord/T,Leendert- 13%, Sta Cruz-9%, y PosChiq, Savaneta.Paradera, Dakota y otronan – 27%
Pa loke ta trata e registracion directo of via otro instancianan: Direct FPNC 26%, DAS 34% y 40% di tur e otro instancianan Amigo di FPNC.
Den e totalidad un 62% ta famianan cu ya caba tabata por wordo categorisa como vulnerabel y den e 38% esakinan ta famianan directamente afecta door di e crisis.
Basa riba e datonan aki riba ta premira cu e grupo cu ta bay tin mester di ayudo pa mas largo tempo ta bastante grandi. E impacto di Covid ta fuerte riba e comunidad considerando cu ela debilita es caba cu tabata vulnerabel y ademas a afecta esnan cu por ser considera stabil. Por spera cu e grupo cu prome cu crisis por a ser considera vulnerabel ta e grupo cu lo mester un sosten mas largo di ayudo.
Sra. Andrina Dirks- Miembro di directiva FPNC
15 mei 2020
