Hopi hende kier core duro bay dilanti, y laga Dios atras, si Dios ta bini na di dos lugar, of ora mi corda ta bon, y esey ta un actitud completamente robes, Dios mester tin e prome lugar den nos bida, Dios ta e fundeshi pa tur cos.
Pa falta di un bon fundeshi Spiritual,hopi hende cay den trampa di enemigo, cual ta afecta nan bida Spiritual, Social, Fisico, y Financiero, integridad y caracter. Pa falta di un bon fundeshi Spiritual hopi hende no ta respeta e palabra cu yama: NO.
E palabra no ta existi pa nan, pasobra nan tin un pensamento, cu kico cu nan kier, nan por haci, pa nan haña locual cu nan kier, no ta importa ken nan tin cu haci daño basta nan deseo wordo cumpli.
Pa falta di un bon fundeshi spiritual orguyo, y arogancia ta drenta, y amargura ta domina bida di hende cu nan ta kere cu nan so ta riba mundo, y no ta tene cuenta cu nan prohimo.
Un bon fundeshi spiritual, no ta nifica un fundeshi religioso, den idolatria, pero e ta estableci den un relacion directo cu nos Señor Cristo Hesus.
Hesus a bisa den Lucas 6:46-48 : Y pakico boso ta yama Mi, Señor, Señor y no ta haci loke mi ta bisa?
Ken cu bini serca Mi y tende mi palabranan y haci nan, lo Mi mustra boso cu ken e ta igual.
E ta igual cu un homber cu a traha un cas, kende a coba hundo y a pone un fundeshi riba e baranca. Y ora cu a bini un diluvio, e torente di awa a suta contra e cas ey y no por a sacudie.
Salmo 127:1 ta para scirbi:Si Señor no traha e cas,ta envano esnan cu ta trahe, ta traha cansa curpa.
Si Señor no warda e stad,ta envano e guardia ta keda lanta. E importancia di un bida spiritual,firme ta primordial den nos bida, pa nos alcansa e proposito di Dios
pa nos bida. Nos bida Spiritual firme no ta mara na placa, tampoco na nos estudio, pero mester ta fundamenta den nos Fe y obedencia na Dios, caminda nos ta reconoce, Dios na prome lugar, y tur sobra cos Dios mes lo añadi den nos bida.
Ora bo nota cuanto problema nos hubentud tin, y awendia hende kier bisti tur cos un bisti politico, Si e mucha no ta bay scol ta politiek, Si e ta cana cu arma ta politiek, Si e ta cana den gang ta politiek, Si e ta cana horta ta politiek. Si tin duda den su identidad sexual ta politiek.
Ta un sistema di schuif e educacion social y spiritual riba politiek, mientras cu e educacion spiritual, social, respet y moral ta cuminsa na cas.
Tene cuenta cu esaki Apostol Pablo ta bisa den 1 Corintionan 3:10-11: Segun e gracia di Dios cu a wordo duna na mi, mi a pone un fundeshi manera un architecto sabi, y un otro ta trahando riba dje. Ma laga kada hende tene cuidao con e ta traha riba dje.Pasobra ningun hende no por pone otro fundeshi, cu esun cu ta poni caba,cual ta Hesus Cristo.
Mundo ta yena actualmente cu hopi fundeshi falso cu no ta mara ni na e Palabra, tampoco e conocemento di Cristo Hesus. Un cas sin un bon fundeshi, su murayanan ta scheur ,pasobra e no por wanta e peso di e dak cu ta riba dje, asina e ta cay den otro. Nos bida mester ta fundamenta den Cristo Hesus, pa asina nos por para contra e atakenan di e enemigo.
