Fortaleza pa famia Scirbi pa Pastor Marcel Balootje : Tene cuidao cu humildad falso

Humildad ta nifica un bida liber di orguyo y arogancia, cual ta un lucha cu tur ser humano tin, pasobra hopi biaha sin nos por pensa, e spirito di orguyo ta presenta y manifesta.

Un tiki pensamento cu nos ta superior riba nos prohimo ta hinca nos den caya di orguyo, cual ta algo cu nos tin cu pidi Dios pa libra nos di dje.Pasobra orguyo ta nifica presencia cu diabel ta loer riba nos caida, pasobra palabra di Dios ta bisa cu orguyo ta bini prome cu caida.

Ta para scirbi den Proverbionan 16:18-19: Orguyo ta bini prome cu destruccion, y un spirito arogante prome cu caida.Ta mihor pa ta di un spirito humilde, huntu humildenan, cu parti botin cu orguyosonan.

Tur hende tin di duna cuenta na Dios, pero nos por evita for di awor di wordo rechasa for di su presencia, y no gamble cu nos bida y bisa larga Dios husgami.

Pasobra si nos biba segun e boluntad di Dios , cu Cristo Hesus na prome lugar den nos curason , nos ta evita di wordo saca for di Dios su presencia.

Ta para scirbi den Romanonan 2;5 : Ma pa motibo di bo capricho y bo curason cu no ta arepenti, bo ta montona furia pa bo mes, den e dia di furia y revelacion di e huicio hustu di Dios.

Kende lo paga cada ken segun su obranan.

Dicon Dios su huicio ta hustu? Pasobra tur locual hende sembra nan lo cosecha. Esun cu sembra pa su mes carni lo cosecha corupcion for di e carni ( Sembra pa su mes carni ta nifica biba den pica, orguyo,arogancia y inmoralidad). Eseynan lo wordo rechasa pa Dios.

Esun cu sembra pa e Spirito lo cosecha bida eterno for di e Spirito.( esaki ta nifica cu esun cu biba pa Dios, reconoce y acepta Cristo Hesus como su Señor y salbador lo wordo ricibi cu tur goso ora Dios manda yame.

Den esaki no ta cuenta di husga hende, pero e berdad mester wordo proclama, pa asina evita cu hende cay den engaño y wordo decepciona. Ningun hende no por haci bofon di Dios.

Orguyo ta sera porta di crecemento spiritual, humildad ta habri porta di bo bida pa mas gracia di Dios. Humildad ta e yabi pa crecemento spiritual.

Colosensenan 2:18-19 ta para scirbi: No laga ningun hende sigi defrauda boso di boso premio, door di hiba gusto den humildad falso y adoracion di angelnan, confiando riba vision cu e a mira,arogante sin motibo, pa causa di su mente carnal. Sin tene na e cabes, for di di cual henter e curpa, siendo sosteni, y teni hunto, pa medio di e scharniernan y cabuyanan , ta crece cu un crecemento cu ta di Dios.

Tur locual nos ta haci mester ta dirigi na Cristo y dirigi na Dios,pasobra ta Cristo Hesus ta cabes di tur cos, e ta e cabes di Iglesia, Cristo Hesus ta sinta na man drechi di e Tata, y ta pesey tur rudia mester dobla di esnan cu ta den cielo, y riba tera,y bao di tera, y cu tur lenga mester confesa cu Hesus Cristo ta Señor pa e Gloria di Dios Tata .( Filipensenan 2:10-11).

Humildad falso ta sosode ora nos no ta somete na Dios,y no ta agradecido pa locual Dios a haci pa nos.

Nos salbacion ta bini di Cristo Hesus, pasobra Cristo Hesus a muri na crus pa nos y ta E unico mediador entre Dios y hende, esey ta nifica tambe cu tur nos alabansa y adoracion mester ta dirigi na Cristo Hesus.