Obedencia ta demostra Fe y Confiansa den Dios. Nos mester ta obediente na Dios, si nos kier logra algo den bida, sin obediencia na Dios no tin crecemento, pasobra crecemento ta bini di Dios.
Orguyo ta pone hende ta purba riba nan mes, pero ora nan ripara cu ta tempo perdi, di purba haci un cos y laga Dios afo, nan tin di bolbe bek na obedencia.
Serca Dios no tin shortcut, sea bo ta haci su trabao manera mester ta, of bo no ta hanja e resultado, manera mester ta. Nos no por haci trabao di Dios con cu ta. Ademas nos tin cu considera cu tur locual nos ta haci ta pa Dios nos ta hacie. Nos famia mester wordo educa, coregi, disiplina y stima den obedencia na Dios, pa asina Dios ricibi tur honor y gloria pasobra Dios riba tur cos.
Nos ta haña curashi ora nos confia cu Fe den e poder di Dios. Curashi pa haci bon ta un gran manifestacion di Fe den Dios. Un gran manifestacion di Fe y curashi a pone David enfrenta y derota Goliat.
Un gran manifestacion di fe y curashi a pone Moises crusa laman cura. Un gran manifestacion di fe y curashi a pone Elias yama candela for di cielo. Un Gran manifestacion di fe y curashi a pone Daniel bay den cueba di Leon y sali ileso. Un Gran manifestacion di fe y curashi a pone Sadrac, Mesac y Abednego wordo tira den forno di candela y sali sin ta hole huma.
Un gran manifestacion di fe y curashi a pone Cristo Hesus, muri na crus pa nos picanan, lanta despues di tres dia for di morto y ta sinta na man drechi di Tata.
Ora nos demostra Fe y Curashi den Señor ta un demostracion cu nos ta kere den Dios 100%. E enemigo ta ofrece cobardia, maldad, traicion y inmoralidad tur caminda, y wak ken ta cay aden y asina permanece den scuridad. Hopi ta cay den su trampa, y no por sali, pasobra cobardia tin nan domina, pero tin poder den e nomber di Cristo Hesus pa libera, tur esnan cu ta cansa y carga.
Sin obedencia na Dios nos Fe ta morto. Stimanan , si nos curason no ta condena nos, nos tin confiansa dilanti di Dios. Y kico cu nos pidi nos ta ricibi for di dj’E, pasobra nos ta warda su mandamentonan y ta haci cosnan cu ta agradabel den Su bista. Y esaki ta Su mandamento, pa nos kere den e nomber di Su Yiu Cristo Hesus, y stima otro mescos cu e ta stima nos. Y esun cu warda su mandamento nan ta permanece den dj’E, y E den dje. Y na esaki nos sa cu E ta permanece den nos,pa medio di e Spirito cu e a duna nos.(1Juan 3:21-24).
Sea fuerte y fortalese boso curaason boso tur cu ta spera den Señor ( Salmo 31:24). Spera riba Señor , sea fuerte y E lo fortalese bo curason, si spera riba Señor.( Salmo 27:14).
Ata e wowo di Señor ta riba esnan cu ta tem’E, riba esnan cu ta spera riba su misericordia.( Salmo 33:18).
Forsa y conocemento ta beneficio di Obedencia. Esun cu paga tino na e Palabra lo haña bondad, y bendiciona ta esun cu ta confia den Señor.( Proverbionan 16:20). Den e tempo trabahoso cu nos ta bibando, nos mester aserca e trono di Dios constantemente, pa nos por haña pronto auxilio y ayudo na tempo. Nos mester di Obedencia, Confiansa , Fe y Curashi.