Nunca perde bo fe den Dios, pasobra pa Dios nada ta imposibel, semper sigui persevera, pasobra esun cu ta persevera den Señor lo tin victoria den tur cos. No lubida cu e palabra di Dios ta bisa cu den Cristo nos ta mas cu vencedor.
Mientras cu tecnologia y ciencia ta avansa, hende ta aparta for di Dios y ta kere den material of den cosnan culto, den spiritonan engañoso, e creencia den placa y poder ta haci cu hopi ta kere cu nan ta Dios, y a hasta tin di nan ta exigi adoracion, y a perde direccion y temor di Dios.
Palabra di Dios ta bisa nos lo siguiente:
Mi alma ta spera den kietud riba Dios so,pasobra mi speransa ta den dj’E. E so ta mi baranca y mi
salbacion, mi defensa, lo mi no wordo movi.
Riba Dios mi salbacion y mi gloria ta sosega, e baranca di mi fortalesa, mi refugio ta den Dios.
Confia den dj’E na tur tempo, O pueblo. Drama boso curason su dilanti.
Dios ta un refugio pa nos.
Hende di nivel humilde ta solamente vanidad,y hende di puesto halto ta un mentira: den balansa nan no ta pisa nada; tur hunto ta pisa menos cu un rosea.
No confia den opresion, ni pone speransa vano den ladronisia, si rikesa rende, no pega bo curason na dje.
Un biaha Dios a papia: dos biaha mi a tende esaki, poder ta pertenece na Dios, y misericordia ta di bo, O Señor: pasobra bo ta paga cada hende segun su obra.( Salmo 62:5-12).
Paisnan rico y grandi kier domina esunnan chikito, y esnan cu no conoce Dios, y esnan cu ta rechasa Dios, y halsa inmoralidad, aprobando cu maldad, ta cay den nan trampa.pasobra poco, poco e plataforma pa e anticristo mester wordo traha, y hopi ta dunando nan cooperacion si tin ningun idea di locual nan ta sembrando, y cu pronto nan lo cosecha decepcion.
E sabiduria di mundo, nunca por vence e sabiduria di Dios, pasobra hende ta wak cosnan temporal, ma e cosnan di Dios ta eterno, maske cuanto mentira avansa, e berdad di Dios lo alcanse y lo derote.
Encomenda bo caminda na Señor, confia den dj’E y E lo hacie.Sosega den Señor y warda cu pasenshi riba dj’E, no consumi pa motibo di esun cu ta prospera den su caminda, pa motibo di hende cu ta ehecuta plan di maldad.(Salmo 37:5+7)
Esnan cu conoce Bo nomber lo pone nan confiansa den Bo, pasobra Abo o Señor, no a bandona esnan cu ta busca Bo.( Salmo 9:10).
Nos ta biabando den un tempo trabahoso, den cual hende ta sera horea pa e palabra di Dios, y ta habri horea pa engaño, y pasobra hende no ta haña necesario pa reconoce Dios, Dios ta entrega nan na un mente perverso pa haci cosnan cu no ta cumbini.( Romanonan 1:28).
Dios no ta complace cu hende, tur locual ta estableci pa medio di su palabra, lo no cambia, cielo y tera lo pasa, mas Su palabra lo no pasa. Yerba ta seca y flor ta marchita, ma e palabra di Dios lo permanece pa semper. Pesey mirando e circumstancia den cual mundo ta encontra, nos mester hala mas serca Dios, pasobra engaño y mentira ta aumenta, y hendenan sabi ta presta nan mes, pa gaña y wordo engaña,nan consenshi a wordo kima cu hero cayente, y nan desobedencia na Dios ta visibel pa tur hende. Pero esnan cu ta depende di Dios lo no wordo derota.Skirbi pa Pastor Marcel Balootje.