Gloria na Dios Tata, Yiu y Spirito Santo, Señor nos ta reconoce cu nos mester di Bo. Nos ta wordo bombardia constantemente cu tentacion y mal pensamento cual ta hiba nos na pica y ta daña nos relacion cu Dios.
Nos mester arepenti pasobra arepentimento ta haci nos humilde, y ta hiba nos bek na e caminda cu nos por scucha e bos di Dios. Arepentimento ta nifica, conoce nos pica y aparta for di dje, y nos por spera pordon di Dios, un bida confortabel y bendicion.
No tin ningun ganashi den un bida di pica y inmoralidad, mentira, falsedad, apoya maldad mientras cu nos conoce e berdad. Nos tin cu tene cuenta pa nos no cay den e sistema di mundo, pasobra e spirito di seduccion mundano, ta scondi den placa,posicion, orguyo y arogancia, y materialismo.
Pesey Dios ta yama tur hende na arepentimento, pasobra nos tur a peca. Si nos bisa nos no tin pica , nos ta gaña nos mes, y e berdad no ta den nos.( 1 Juan 1:8).
Pesey Dios den su inmenso amor ta yama nos na lo siguiente: Repenti anto y comberti, pa boso picanan por wordo kita, pa temponan di refrescamento por bin for di e presencia di Señor, pa e por manda Hesus e Cristo destina pa boso.( Hechonan 3:19).
Asina Señor di ehercitonan ta bisa; Bolbe serca Mi,e Señor di ehercitonan ta declara, pa mi bolbe serca boso, e Señor di ehercitonan ta bisa. ( Zacarias 1:3). Si nos confesa nos pica, E ta fiel y husto pa pordona nos, nos picanan y pa limpis nos di tur inhusticia.(1 Juan 1:9).
Esun cu sconde su picanan lo no prospera, ma esun cu confesa, y laga nan lo haña misericordia.(Proverdionan 28:13). Si boso ta dispuesto y ta obedece,boso lo come e mihor di e tera, ma si boso nenga y rebeldia, spada lo devora boso. Di berdad e boca di Señor a papia ( Isaias 1:19-20).
Salmo 103 ta duna nos un pakete completo di e beneficio di Dios ora nos arepenti. E ta demostra nos cu Dios ta pordona,Dios ta separa nos picanan for di nos, Dios tin compasion di nos, mescos cu un tata tin compasion di su yiunan. Tambe E ta corda nos un biaha mas cu Dios ta sana tur malesa y pordona tur pica.
Pasobra satanas y su mentiranan ta avansando den mundo, pa degenera e creacion di Dios, poniendo den mente di hende cu nan no ta e creacion cual Dios a crea nan. Asina cu hende ta cuminsa, actua, biba y manifesta den un rebeldia completo contra di nan Creador.
Arepentimento ta duna nos un bista ken Cristo Hesus ta den nos bida. E ta kita e miedo cu pica a trece. Pasobra pica ta trece miedo y berguensa,( Genesis 3:10) y ta e causa cu hende no kier confesa, pesey nos tin di arepenti diariamente pa e diabel no cohe bentaha riba nos.
Tur caminda di hende ta recto den su mes bista, ma Señor ta pisa curason.( Proverbionan 21:2).
Mi admiti mi pica na Bo,y mi inikidad mi no a sconde: Mi a bisa lo mi confesa mi trangreshon na Señor y Bo a pordona e culpa di mi pica.( Salmo 32:5).
Nos ta trangresa y ta nenga Señor,y ta bira for di nos Dios, nos ta papia di opresion y rebeldia, y ta pensa y papia palabranan di mentira,cu ta origina den nos curason.
Huicio ta wordo rechasa, y husticia ta keda para leu, pasobra berdad a trompica den caya, y integridad no por drenta.( Isaias 59:13). Ta tempo pa arepenti.
