Un tempo por a corda cu tabata masha popular aki na Aruba e frase “no hay cama pa tanta agente”. Un frase uza den tempo di abundancia di Aruba. E tempo cu Aruba tabata un paraíso pa stranheronan. Cu e situacion causa door di pandemia y e era post-pandemia ta surgi otro frase cu ta “e cama no ta comodo mas”. Esey ta e realidad di awendia riba Aruba.
E era cu Aruba su economia tabata florece y e hendenan ta biba na grandi por bisa ta pertenece na pasado. Na dos ocasion por lo menos por a lesa den articulonan publica den exterior entrevista cu periodistanan ta haci principalmente cu Venezolanonan cu ta biba na Aruba, sea di forma legal (cu permiso pa traha of permiso di asilo, o sea refugiado) of ilegal.
Loke ta resalta den e articulonan ey ta con e stranheronan aki ta papia di e bida duro cu nan ta hiba riba e isla. Esaki ta un realidad sinembargo cu nan mester enfrenta y tuma decision si ta keda of bay. Pa e propio Arubiano, cu semper a biba riba su isla, e situacion ta uno hopi dificil, mescos cu na hopi pais na mundo. E pandemia a trece repercusionnan grandi y un di nan a cuminsa sinti caba ta cu bida a bira carisimo. Mas na Aruba cu e prestamonan inmenso cu mester a haci y cual mester paga bek, combina cu e debenan di pasado cu ta haci cu mester tuma un cantidad di medida. Pero tambe haci reformanan cu den e situacion actual sigur pa e ciudadano e ta un peso inmenso.
Y husto den e situacion aki ainda tin ciudadanonan di pais bisiña cu ta trata di drenta di forma ilegal, Tin hopi otro cu a pidi asilo politico, cual proceso ta atrasa y ta causa cu nan tin kizas mas cu un of dos aña en espera.
Tin paisnan hopi mas grandi cu Aruba cu tin miho sistema pa acapara e grupo di hendenan aki. Inclusive na nan pais tin hopi mas posibilidad di loke nan tin aworaki na Aruba unda ta hiba un lucha continuo pa sobrevivi, mescos cu un grupo grandi di Arubianonan. E situacion local ta hopi dificil y no mester gaña pasobra debi na e prijsnan altisimo di productonan por bisa cu hopi ciudadano di e isla aki ta den e mesun situacion cu un grupo na Venezuela. E placa no ta yega y Gobierno no ta den e posicion pa yuda e stranheronan cu haya nan mes ta biba den miseria.
Pa e Venezolanonan cu kier bini Aruba ta miho biba den un pobresa of miseria na bo pais cu biba den e situacion aki na un pais cu no ta di bo y unda e posibilidadnan ta limita. Venezuela tin masha hopi recurso unda cu ta e propio ciudadano ta esun cu mester traha y hiba su pais dilanti. Tin un frase na Spaño cu ta bisa “no hay mal que dure cien años”. Arubiano lo bay lucha pa bay dilanti den su pais y e ta algo cu e Venezolanonan tambe mester reflexione riba dje. Niun hende por hiba e lucha pa nan si no ta nan mes y den nan pais.