For di 14 di sèptèmber 2022, siudadanonan ku un entrada abou por pidi un kompensashon di 1.300 dòler pa koriente. Ta duna e kompensashon ún biaha. Ta pa siuidadanonan ku un entrada abou ku mensualmente ta haña un resibu di koriente di WEB òf tin Pagabon. Nan por hasi un petishon riba www.bonairegov.com. Nan por pidi e kompensashon tambe na un sentro di bario.
Direktorado Komunidat i Kuido ta atendé ku e petishonnan pa e kompensashon. Tin kondishon pa haña e kompensashon. Asina esun ku hasi e petishon mester ta inskribí na Boneiru na Ofisina di Registro Sivil. Ta mira haltura di entrada di e persona ku ta pidi e kompensashon. Tambe ta mira kuantu hende den kas tin un entrada, i kiko ta e total di entrada. Pa petishon di e kompensashon, esun ku hasi e petishon tin ku entregá dokumento. Pa esaki mira riba www.bonairegov.com
Si un hende tin derechi riba e kompensashon, ta depositá e montante di 1.300 dòler riba kuenta di e persona na WEB. Un persona ku no tin debe pendiente na WEB, tin e ora ei un montante di 1.300 dòler pa paga su koriente. Ta deskontá e ora ei e montante ku e persona mester paga WEB di e 1.300 dòler.
Tanten ku e persona tin sèn riba e kuenta na WEB, e mes no mester paga e kuenta. Ora el a usa tur e sèn, e persona mes mester paga e kuenta atrobe. Riba e resibu di koriente di WEB, un persona por mira kuantu sèn e tin ainda di e kompensashon. Empleadonan di Direktorado Komunidat i Kuido ta rekordá siudadanonan na tempu ki ora nan mes mester paga e kuenta atrobe.
Si un persona tin un debe pendiente na WEB, ta deskontá e debe for di e kompensashon di 1.300 dòler. Si a kita koriente serka un hende, ta deskonktá e 40 dòler pa bolbe konektá koriente for di e kompensashon.
Siudadanonan ku Pagabon ku tin derecho riba e kompensashon, ta haña un token (un bòn) di 1.300 dòler ku un kódigo. Ku e kódigo nan por rekargá na kas e montante di 1.300 dòler den e kashi di Pagabon. E kódigo ta funshoná solamente na e kashi di e persona ku ta haña e kompensashon. Pues un otro hende no por usa e token.
Pa e preguntanan mas hasí i splikashon tokante e kondishonnan di e kompensashon, mira riba www.bonairegov.com òf e página di facebook ‘Gobièrnu di Boneiru’. Si nan tin pregunta, habitantenan por yama òf app 701 10 55, òf manda un meil pa koriente@bonairegov.com
