No tin mag di bende òf regalá saku, kos di drai bibida, pipa pa bebe kuné, kuchú, fòrki i kuchara di plèstik desechabel i baki di kuminda di fom na Boneiru. Pa violashon di e prohibishon akí bo por haña un atvertensia i/òf un but (un suma ku bo tin ku paga ora ku bo no kumpli ku un obligashon legal).
Durante e último lunanan inspektornan di direktorado di Supervishon i Mantenshon di Lei a inspektá 50 negoshi di horeca, 5 bendedó di riba kaya i vários supermarket i negoshi di benta por mayor. Durante e inspekshonnan akí kaminda tabata nesesario un biaha mas a mustra e diferente negoshinan akí riba e prohibishon di plèstik desechabel. Un gran parti di e negoshinan ta tene nan mes na e prohibishon. Lamentablemente te ainda tin negoshi ku ta violá e prohibishon di plèstik desechabel.
Karta di atvertensia
For di 1 di desèmber 2022 e negoshinan ku no ta tene nan mes na e prohibishon ta haña un atvertensia formal. Pa esaki e negoshi ta risibí un karta di atvertensia formal. E atvertensia akí tin un término di un (1) siman.
Suma ku tin ku paga ora no kumpli ku obligashon legal
E negoshi tin un (1) siman di tempu pa tene su mes na e prohibishon. Si nan no hasi esaki, e ora ei nan ta paga un suma (un ‘but’) pa kada término ku nan no tene nan mes na e prohibishon. Esaki nos ta yama na hulandes un ‘last onder dwangsom’, un suma ku bo tin ku paga ora bo no kumpli ku un obligashon legal. Un negoshi ta haña un ‘but’ ora e negoshi akí despues di e término di un (1) siman, tòg ta violá e prohibishon di plèstik desechabel. Altura di e ‘but’ ta dependiente di grandura di e negoshi. Un negoshi por haña en total 4 ‘but’.
Por ehèmpel: un empresa chikí (1 pa 5 empleado) por haña un suma total di $ 2000 na ‘but’. E promé violashon $ 200, e di dos violashon $ 400, e di tres violashon $ 600 i e di kuater violashon $ 800.
Nos tur na biba di naturalesa. Plèstik desechabel ta malu pa nos naturalesa i medio ambiente. Pa e motibu akí ta importante pa nos tur tene nos mes na e prohibishon di plèstik desechabel. Huntu nos ta hasi Boneiru liber di plèstik.
Bo ta ripará ku un negoshi no ta tene su mes na e prohibishon di plèstik desechabel? Mèldu esaki e ora ei via info@bonairegov.com.
PERSBERICHT