FLP a conmemora Abolicion di Sclavitud den un sala yen na Centro di Bario Playa Pabou

Anochi di FLP tabata fructifero:

Tin un necesidad grandi pa haya informacion tocante sclavitud y enseñansa

Bispo di Conmemoracion di Abolicion di Sclavitud, diabierna dia 30 di juni ultimo, Fundacion Lanta Papiamento (FLP) a tene un anochi di informacion y discusion tocante sclavitud y enseñansa. Tabata un anochi exitoso cu sala yen.

Ramon Todd Dandaré Mag. Ling. a tene un introduccion tocante desaroyo di Papiamento, di tempo di sclavitud te awe.

Dr. Joyce Pereira a papia tocante e influencia di colonisacion y sclavitud riba nos pueblo via enseñansa cu te ainda por sinti den tur forma. E publico presente tabata masha interesa y a participa activamente cu pregunta, idea y preocupacion. Claro cu den dos ora no por a trece tur cos dilanti, p’esey FLP a priminti

di organisa pronto mas anochi cu e topiconan aki.

Tabatin declamacion di poesia di parti di miembro di directiva Evelyn Ruiz-Croes,  Rubia Bernabela y Ramon Todd Dandaré.

FLP ta gradici esnan cu tabata presente, directiva di Centro di Bario Playa Pabou y tambe Adoncito Croes cu a yuda boluntariamente e anochi aki. FLP t’ey pa informa y conscientisa, pasobra Papiamento ta nos idioma, nos derecho!