Pa loke ta trata finansas di Aruba hopi ta wordo comenta y hopi ta wordo critica, pero e realidad di e stabilidad economico cu Aruba tin poco ta elogia cu tin y esaki ta di lamenta mirando tur e trabaonan cu profesionalnan huridico y di finansas a haci pa scapa Aruba di un desaster economico. No ta un secreto cu mundo y Aruba tambe a pasa den un temporada dificil, pero pueblo di Aruba por ta orguyoso y ta trankil cu Aruba ta stabiel economicamente.
Minister di Finansas Xiomara Maduro ta kere ta importante cu companianan di rating manera Fitch rating, Standard & Poors, di afo ta wowonan cu ta evalua e situacion financiero di Pais Aruba y ta duna Aruba un rapport di kico nan ta wak y con Aruba ta desaroyando.
Ultimo den luna di maart ambos compania di rating a duna nan punto di bista unda cu no solamente ta wak Aruba stabiel, pero tambe ta mira Aruba positivo.
Kico kiermen na momento cu ta mira Aruba den e categoria positivo? Esaki ta significa cu nan ta cambia nan opinion riba Aruba unda cu a hisa e nivel di stabiel pa positivo. Tanto Fitch Rating, y Standard & Poors ta mira cu Aruba a bay padilanti unda cu turismo a bin na forma grandi y por a mira cu economia a cuminsa lora y tin hopi cupo di trabao cu tin mester di hende pa traha.
Un otro señal cu ta ser duna tambe cu Aruba ta stabiel ta cu tur e mehoracion di e economia ta wak e bek den e finansas publico, dus placa ta drenta caha di gobierno y eynan e por wordo distribui den comunidad.
Pa por logra tur esaki trabaonan serio a tuma luga unda cu a tuma decisionnan cu a pone cu Aruba a bira stabiel, entre otro a baha e presion di debe. Tambe Fitch Rating, y Standard & Poors ta mira cu Aruba tin presupuesto cu surplus y esaki kiermen cu no tin cu traha debe nobo. Aruba tin pa dos aña un surplus y esaki ta mustra claramente cu Aruba tin un mehoracion con ta maneha finansas publico.
Fitch Rating, y Standard & Poors ta confirma cu Aruba ta un Pais sigur pa inversionnan tuma luga. Pa e motibo aki mes tin inversionistanan ta confia Aruba cu nan inversionnan. Tambe na momentop cu Aruba mester presta placa Aruba por ricibi esaki, no solamente como gobierno pero e sector priva tambe por haya esaki na un interes mas reduci. Porehempel servicio bancario lo ta mas barata. Si Aruba tabatin hopi risico y no tabata un Pais Stabiel lo e la costa e sector priva mas.
