Tin hopi Arubiano interesa pa dedica nan mes na cultivo. Specialmente después cu durante e ultimo añanan e gobiernonan cu a sinta a cuminsa promove practica di agricultura. Lamentablemente por a tuma nota cu en bes cu ta duna preferencia na localnan pa yega na remarca pa huurgrond, ta otorga esaki na stranheronan cu ta mira aki un oportunidad pa haci negoshi.
Y esaki ta sosode cu cooperacion di funcionarionan halto encarga cu ta firma pa otorga tereno di pueblo na grupo stranhero. Sinembargo si nan cana e caminda corecto y warda mes hopi cu un local nos ta papia di un balance y igualdad y sigur husto pa nos localnan biba na Aruba.
Actualmente tin un retraso cu ta surpasa mas cu mil peticion cual na inicio na momento cu Minister Evelyn Wever Croes a tuma e cartera di infrastuctura a bin cu un aanpakplan pa atende cu tur e retrasonan cu tin na DIP. Sinembargo cu e maneho di e director esaki no a tuma luga. Ta bisto cu e maneho cu e director actual di DIP ta hibando ta willekeurig , ta e mes ta dicidi con, ki ora y ken ta haya tereno.
Por a corda cu Prome Minister a duna e director di Departamento di Infrastructura y Planificacion (DIP) un mandato unda cu prácticamente e por haci tur cos y tuma decision, mescos cu e minister di Infrastructura mes. Pero cu e ta cumpli cu integridad den su maneho , esey ta cuestionabel, mirando tur loke cu ta pasando den e departamento.
Aki ta caminda e kehonan a cuminsa drenta di discriminacion contra Arubianonan den entre otro otorgamento di terenonan di huurgrond. Ta parce cu Arubianonan cu ta riba e lista largo di peticion pa haya tereno di 1000 m2 of mas, no ta atractivo pa cultiva na Aruba. Esaki pasobra por nota cu stranheronan cu ta bini despues, si ta haya nan tereno, grandi y sin cu nan a lanta negoshi mes ainda.
Ultimo tempo por a tende e nomber di STR Agriculture and Real Estate, guia pa ciudadanonan di Guyana, kendenan a haya un pida tereno basta grandi na Aruba. Prome Minister di Aruba a duna e director di Departamento di Infrastructura y Planificacion (DIP) un autoridad, pero cu e caso aki ta demostra cu e ta duna preferencia na stranhero en bes di localnan. A duna conseho positivo, di un forma rapido y unda por nota, segun e fluho y intercambio di documentonan, no a tuma luga di unda e placa di inversion aki ta bini.
E compania aki a haci un peticion dia 7 di mei, 2020. Ya caba dia 10 di juli e Departamento concerni (DNM) di medio ambiente a duna un conseho positivo, y e mesun luna ey tabatin cita pa encamina e proceso di otorga e tereno. Dia 30 di maart, 2021, a haya e tereno pa un periodo di cinco aña. E tereno cu a otorga na e grupo aki ta uno di 15.500 M2 na Alto Vista.
E ariba menciona no ta problema. Pero si bay riba registra di Camara di Comercio, lo nota algo straño. E compania aki a wordo lanta dia 25 di juni, 2020. Ariba por lesa cu e peticion pa tereno a wordo haci dia 7 di mei, 2020. Un discrepancia cu e director, cu ta esun cu ta firma e documentonan, mester por a tuma nota di dje, of tabata na altura di esaki y kisas a prefera pa ignora e dato importante aki. Hustamente pa e tipo di cosnan aki, awe exminister Benny Sevinger ta bou di investigacion.
Den e mesun documento di contracto cu pais Aruba, no ta lesa ningun caminda cu si e compania cambia di shareholder of move e share nan for di e compania aki pa un tercero, nan tin e deber di informa e minister responsabel di esaki. No tin un provision cu ta duna minister garantia, cu si e compania aki kier move of bende su sharenan, e lo mester pidi permiso prome na e minister pa e ta na altura. Pues ta masha discrepancia of omisionnan tin, cu ta laga caminda habri pa hopi manipulacion den futuro. Tin casonan den pasado cu a sosode di e mesun forma, unda sharesnan a bula bay sin cu Aruba ta na altura di dje.
Tin un deber etico y huridico cu na momento cu un director keda notifica cu placa ta bay bin di afo, e Director tin deber di haci un compliance riba e cliente. Den e caso aki no ta conoci riba kende mester hasi compliance , e compania of esnan cu a agrega den dje awo of esun cu a soliste 7 di mei 2020. Esaki ta algo cu e ex minister Tromp a trata di saca afo di e director, pa sa ken e persona nan aki ta y nan source of funds. Sinembargo no a logra esaki mirando tur e retonan cu e ex minister tabatin pa su posicion como minister di infrastructura e tempo ey. E ex mandatario a papia hopi di spirito y e spirito mayor ainda ta den DIP y cu mandaat ricibi dor di gobierno actual. Awor aki si analisa loke cu tur ta pasando e mandaat cu e director a ricibi ta pone cu tipo di cosnan asina ta sosode y lo keda sosode tanten cu e tin e mandaat aki den su poder.
E forma di proceder aki ta lanta e pregunta: Dicon Arubianonan mester keda riba lista di espera asina largo y tin asina hopi exigencia pa nan, mientras cu stranheronan ta yega y ta haya tereno di un forma rapido. Con nan ta logra haya aprobacion asina rapido di e director di DIP. Di con ta permiti nan haci peticion y despues lanta e compania. Tin hopi mas pregunta.
Ta importante pa comunidad mes tuma nota di tur e fechnan di tur e peticionnan cu a wordo tuma y e rapides cu nan a keda atende, ta un forma incomprendibel cu tipo di caso nan asina ta pasa na Aruba y cu director di DIP cu ta esun cu a haya e poder pa sigui un maneho , pero cu no ta haci esaki y awe por tuma nota di tur e actonan aki cu por ta pasando. Den e Segundo parti EA News lo bin cu un otro caso cu a yega den nos box cu ta papia di un bestemingweizeging.
