Dia 10 november, Stichting Jantje Beton y Stichting Centro pa Desaroyo di Aruba (CEDE ARUBA) a firma un Memorandum di Entendemento (MOU) importante na Cas di Cultura.
E evento a wordo atendi pa un grupo grandi di interesadonan den nos comunidad, entre otro e sector di turismo, hotelero, banconan, diferente companianan y tambe fundacionnan local y departamentonan di Gobierno. Tur a demostra di tin un interes grandi pa yega na lugarnan mas adecua y sigur cu ta na beneficio di nos muchanan y hobennan na Aruba.
Jantje Beton ta un organisacion experto ariba realización di lugarnan di hunga pa mucha. Desde 2020 nan a expande nan area di trabou pa henter Reino Hulandes. E realizacion di un speeltuin nobo na Boneiro dor di Jantje Beton y nan plan pa crea ainda mas luga di hunga na Boneiro, Saba y Sint-Eustatius, awor por bira realidad. CEDE ARUBA a hacie posibel pa Jantje Beton por a bin Aruba y haci un investigación riba (lugarnan di hunga) speeltuin y nan seguridad aki na Aruba. Desde januari 2023, CEDE ARUBA ta encarga cu e proyecto BARIO UNICO, den colaboración cu Gobierno di Aruba, Centronan di Bario y un cantidad grandi di organisacionan. E forma con pa mehora facilidadnan pa hunga di mucha ta cuadra perfecto den e plan aki. Dia 9 di november, Jantje Beton a ricibi1,5 miyon euro for di Nationale Postcode Loterij ta pa realisa seis speeltuin adicional riba e islanan di reino hulandes, incluso dos pa Aruba.
E acuerdo entre Jantje Beton y CEDE ARUBA a wordo acorda entre Stichting Jantje Beton, representa pa e Director-Gerente, Sr. Dave Ensberg-Kleijkers, Stichting Centro pa Desaroyo di Aruba (CEDE ARUBA), representa pa e director, Sr. Daniel B Tecklenborg. E financiamento pa e proyectonan lo sali for di e presupuesto anual di e partidonan y/o lo ser solisita na organisacionan externo manera NGO, sponsernan comercial y particular, fondonan internacional y programanan di Union Europeo.
E colaboracion aki tin un termino di 3 aña, cual lo ser evalua cada aña y cu oportunidad pa eherce e recommendacion den e siguiente aña. Adaptacion den e protocol di colaboracion por wordo hací cu acuerdonan mutuo di e partidonan.
E protocol di colaboracion historico aki a bira activo riba 10 november 2023, dilanti diferente stakeholders cu a duna nan conocemento y surgerencianan na e dos entidadnan aki cu a firma e acuerdo. E colaboracion aki ta personifica e dedicacion y compromiso di tur dos organisacion cu e mesun meta cu ta na bienestar di muchanan y hobennan na Aruba y den Reino Hulandes. Un otro meta cu CEDE ARUBA kier alcansa pa mehoracion den estilo di bida den barionan na ARUBA.
