Mateo 19:6 ta cuminsa bisa nos cu Locual cu Dios uni no laga hende separa, ta parce algo cu a bay den buki di olvido, ora nos ta papia di integridad. Pasobra integridad den matrimonio ta algo di hopi balor. Caba biaha cu nos devalua e pricipionan di Dios nos ta devalua e norma y balor den nos hogar.
Hopi hende ta casa y ta keda biba cu un mente soltero, of tin no ta casa mes, y ta prefera di biba, pa asina nan free for all por sigi tuma lugar sin ningun estorbo, kiermen si e persona cu bo ta hunto cune no gusta e por bay, y un otro ta bini, pero esey no ta e integridad cu nos mester tin.
Beibel ta conta nos cu den Mateo Capitulo 14 ver 4-5–6-7 Juan Bautista a perde su cabes pa motibo cu e a reprende rey Herodes pasobra e tabatin relacion cu Herodias kende tabata muhe di su ruman Felipe. Un homber di Dios a hala un rey su atencion cu su relacion ta pone su integridad na peliger, y esey a causa cu su cabes a wordo kita door cu e muher a keda na berguensa.
Awendia ora nos ta papia di screen un persona sea homber/muher pa e ocupa un puesto como representante di nos comunidad, no solamente , mester wak estudio, finansas, gremio, famia, pero tambe e mester ta un persona sea e ta casa of soltero,y esaki ta conta pa tur posicion, e no por ta un persona cu ta drumi lanta tur dia serca un pareha diferente, esey ta atacha su integridad, y hasta pone su bida na peliger.
Hopi hende ora yega na e parti ey , nan ta bisa ta nan bida priva, pero dilanti di Dios no tin bida priva, dilanti di Dios tur cos ta habri , un persona cu ta den infieldad no por goberna na su cas, y si bo no por goberna bo cas, cual ta ehempel cu bo ta duna como cuidadano.
Nos no por tapa solo cu un dede, pero habri nos wowo y wak pasobra nos tin miles di hobennan ta busca conseho y ehempel den nos comunidad, y kico nan ta mira, esey ta ehempel di locual nan ta sigi. Hubentud mester di role model y integridad di hende grandi ta hopi importante pa nan.
Infieldad a bira asina facil, cu hende no ta ripara e daño cu e ta causa of ta causando den comunidad, infieldad ta trece violencia domestico, abandono di hogar, morto, suicidio, famia kibra, y muchanan despampara.
Den 1 Corintio 6 vers 16 ta bisa lo siguiente: Of boso no sa cu esun cu uni su mes cu un prostituta ta un curpa cune.Pasobra E ta bisa E dosnan lo bira un carni, vers 17 ta bisa : Ma esun cu uni su mes cu Señor ta un Spirito cu nE. vers 18 ta bisa : Hui for di inmoralidat.
Hopi excuus ta wordo usa pa comete infieldad, pero infieldad ta parti di inmoralidad, y ta enemigo di Integridad.Hopi hende ta wak cuanto amigo (a) ta bati man riba nan schouder pa e cantidad di muher/homber cu nan tin den nan bida pero otro banda nan no ta wak e rechaso di Dios den e asunto aki, pasobra bo ta rebaha Dios su standarte, y door di haci esey bo integridad tambe ta corre peliger.
Famia ta base di un pais, matrimonio ta e centro di bida. mas matrimonio fiel mas famia fuerte, menos problema social, menos gasto pa gobierno, mas mucha ta gradua, menos mucha riba caya, menos divorcio, y esey ta e deseo di nos tur. Nos crisis social no ta Covid pero e infieldad cu a aumenta asina hopi y cual awor mas cu nunca nos ta mira e consequencia.
Dios ta un bon Dios e ta fiel y e ta pordona ora nos arepenti, y libra nos di tur maldad, si awe bo ta den e situacion di infieldad, bo por arepenti di henter bo curazon y sali, y drecha bo hogar , y uni cu bo famia. Dios su brasa ta habri pa pordona, y restaura bo integridad.
E husticia di nos Señor Cristo Hesus ta e base pa nos Integridad.
Nos kier bolbe recorda bo pa haci oracion riba eleccion pa asina Dios duna nos gobernante balente pa dirigi nos pais den e tempo dificil aki.
