Felisitacion na Partido RED democratico Aruba

Dia 30 di mei 2023 partido ReD a celebra su 20 aniversario cu su miembronan na ATIA Buildingden un reunion extraordinario. Pa e ocasion aki mr. Michiel Bijkerk di Boneiro a manda e siguiente palabranan di felicitacion:

“Ta un honor p’ami di a wòrdu invitá pa manda un mensahe na Partido RED Democratico di Aruba na okashon di su di 20 aña di eksistensia. Dos biaha Partido RED a invitá mi den pasado pa hiba palabra na miembro- y invitadonan di RED. Mi no ta kòrda over di kua tópiko, pero mi sí ta kòrda ku e diskushon despues di e charla semper tabata habrí y positivo. 

Nos ta gradisido tambe pa e esfuersonan ku Pader Rudy Lampe a hasi pa sostené partidonan progresivo na Boneiru. Pader Lampe y partido RED ta manifestá un poder polítiko/spiritual ku nos islanan mester. 

Integridat tabata e promé tema ku RED a enfatisá tempu a lanta e partido 20 aña pasá. Komo ku RED ta un partido di prinsipio, ta di mes e lo no haña hopi voto. Un partido ku no ta kumpra voto, no ta haña voto. Esaki no ta algu pa sinti bèrgwensa over di dje. Al kontrario, RED mester ta orguyoso ku RED ta konsiderá prinsipio mas importante ku voto. Asina RED por keda e konsenshi di Aruba. E bos ku no ta papia duru, pero ta papia bèrdat. 

Sin embargo, RED a yega di haña asiento y asta a forma parti di gobièrnu di Aruba. Pues, te ainda ta posibel pa ta sinsero y alabes ta polítiko. No ta fásil, pero posibel. Mi ta spera ku RED nunka lo no pèrdè su prinsipio. Y, kon ku sea, NO ta posibel mes pa yega na resultado bon y duradero, si ta usa métodonan malu. Usando método bon, bo tin un kaminda largu bo dilanti, pero ta e úniko kaminda ku ta bale la pena.

Mi ta deseá Partido RED hopi aña mas di bida. No pèrdè fe. Sigui semper riba e kaminda smal.” 

E palabranan aki di Bijkerk a keda bon risibi pa e publico presente. ReD a cumpli cu su prinsipionan, esun cu mas voto ta drenta parlamento pa kibra cu stempelparlement, y a goberna e ministerio di educacion segun reglanan di bon gobernacion cu respet pa plaka di pueblo. Nos ta conciente cu berdad y honestidad no ta duna bo voto. Pero ReD lo no cai den e tentacion pa laga su prinsipionan cai djis pa haya mas voto. Esei ta e trayectoria di 20 aña di ReD, fiel na su prinsipionan. Awor e palabra ta na e votador, e por fin lo apoya esun cu ta para pa integridad? 

ReD ta cla pa sigui sirbi e pueblo di Aruba. Na final di e reunion extraordinario di miembronan di ReD a relaunch nos website: www.redaruba.org. Tambe por bishita nos FB page renoba: Red Democratico Aruba.