KRALENDIJK, Bonaire
Na yüli 2020 ta bira posibel atrobe pa bini Boneiru for di algun pais Oropeo. Gezaghèber Rijna a hasi un petishon pa esaki na ministerio di Infrastruktura i Maneho di awa. Esaki ta bon pa turismo ku ta e pilá mas importante di ekonomia di Boneiru. Pakus i negoshinan por risibí klientenan for di eksterior atrobe. For di mart niun turista no por a bini Boneiru mas.
Boneiru a drenta un otro fase aworakí. Na mart, ora e krísis a kuminsá rondó di e vírùs di corona a skohe pa protehá salú públiko na Boneiru promé. A sera espasio aéreo pa bishitantenan di afó. A prohibí aglomerashon di hende i tambe a sera skolnan. Esakinan tabatin impakto grandi riba hinter komunidat di Boneiru. Den e fase nobo ku nos a drenta, tur hende por bini Boneiru atrobe for di eksterior.
Tin algun regla ku a introdusí durante e krísis di corona ku lo keda vigente den e fase nobo. Esaki pa evitá ku un hende por infektá un otro. Ta resultá ku e chèns pa infekshon ta chikí si tur hende keda mantené 1,5 meter di distansia for di otro i tambe sigui laba man hopi. Mientrastantu ku no tin un vakuna pa kombatí e vírùs di corona nos mester kustumbrá ku ta asin’aki ta e manera ku nos tin ku anda ku otro.
For di aprel no tin mas kaso di COVID-19 na Boneiru. Awor ku sa ku e chèns pa keda infektá ta chikitu por habri frontera atrobe. A kalkulá ku mester di trinta avion yen pasahero ku ta bini Boneiru pa haña un persona infektá mei mei di nan. Dòkternan di kas, hospital i Salubridat Públiko ta prepará pa si tin un kaso di COVID-19.
Gobièrnu tin hopi apresio pa e manera ku komunidat a koperá tur e tempu i mantené nan mes na e reglanan. Gobièrnu ta konta ku den tempu binidero ta mantené e disiplina pa sigui kumpli ku e reglanan di higiena. Huntu nos ta para fuerte kontra corona.
Boneiru ta sigui e desaroyonan rònt mundu i den region tokante vírùs di corona. E tim di gobièrnu ku ta atendé ku e krísis di corona ta vigilá tur kambio pa asina deliberá kiko ta mihó pa Boneiru. Si ta nesesario Boneiru ta bini ku mas medida.
