Den polítika, no ta trata unikamente di ideologia i logro di idealnan. Realidat ta indiká ku sin plaka, no por tin partido polítiko. For di unda e finansiamentu ta bini, ta determiná e konfiansa ku e pueblo tin den polítika en general pero tambe den funshonamentu di demokrasia den un pais. Pasobra hopi ta kere den e konsepto ‘Esun ku ta paga, ta manda’. Di unda e fondonan ku nos partidonan polítiko ta dispone di dje ta bini? E ta bini for di kompanianan lokal ku ta operá di un forma korekto, fundashonnan, dunadónan ekstranhero, òf “Sugar Daddy” anónimo?
Introdusi transparansia, regulashon, i kreando mas klaridat den finansiamentu di partidonan polítiko ta di sumo importansia! Na Kòrsou a introdusí, na 2010, e ‘Landsverordening Finansiamento di Organisashonnan Polítiko’ (referí komo: Landsverordening) pa promové integridat den partidonan polítiko.
No obstante ku e Landsverordening aki ta un paso den e bon direkshon, segun Transparency International (TI) den nan informe di 2013, ainda a identifiká varios buraku i ambiguedat den e forma ku e leinan ta skibí. Esakinan por disminui e efekto di e funshonamentu di e reglamentu. TI a rekomendá pa evalua e finansiamentu di partidonan polítiko i pa renobá e leinan pa hasi kontrol di grupo polítiko i nan kandidatonan individual di manera mas efektivo.
E Landsverordening ta obligá un partido polítiko pa entrega un rapòrt anual i un rapòrt finansiero promé ku 1 di aprel na Konseho Elektoral Konseho (KE), ku ta e kontinuashon di Hoofdstembureau di Kòrsou. E rapòrt mester kontene informashon tokante e posishon finansierdo di e partido i alabes un deklarashon konsolidá tokante entrada i gastu. KE ta manda e rapòrt finansiero pa Stichting Overheidsaccountantsbureau (SOAB), ku ta kontrolá e si e dato den e rapòrt ta kumpli korektamente.
Finalmente, SOAB ta manda su konseho tokante e rapòrt na KE. Partidonan polítiko mester entrega tambe un resumen di regalonan/donashonnan promé ku 1 di februari di kada aña na KE. Esaki ta konta tambe pa kandidatonan individual ku a partisipá den
elekshon di Staten mester entrega un resumen di e regalonan risibí un luna despues di e dia di elekshon na KE. Na us turno, KE por pidi na SOAB tambe pa kontrolá riba e realidat di e informashonnan risibí. E resultadonan di e kontrolnan di SOAB ta keda warda den archivo di KE. Un di e burakunan den e lei ta e ausensia di un obligashon pa publikashon di dato. Konseho Elektoral i SOAB, segun artíkulo 20 di e Landsverordening, tin di tene nan mes na un obligashon di konfidensialidat. Kualke violashon di esaki ta konsiderá un krimen.
KvK 135804 | korsoutransparente@gmail.com www.facebook.com/KorsouTransparente. E Landsverordening tampoko ta rekerí e partido polítiko mes pa publiká su informashon finansiero i tampoko ta permití publikashon di resumen di regalonan na partido polítiko i nan kandidatonan.
Esaki ta hasi e kontrol públiko tokante e sosten finansiero di partidonan polítiko praktikamente imposibel. Segun e rapòrt di Transparency International, ta resultá ku asta den e kaso ku un persona hasi un apelashon husando e Ley di Openbaarheid van Bestuur, ta hopi probabel ku nan lo no risibi informashon tokante finansiamentu die partidonan polítiko. Pa fomentá transparensha, partidonan polítiko mester duna klaridat riba nan finansiamentu, segun TI.
Kumplimentu di e Landsverordening Si KE konstatá òf ta sospechá ku un partido polítiko òf un kandidato a komete un akto ku, segun e Landsverordening, ta un krimen, nan ta hasi aangifte segun artíkulo 18 di e Landsverordening na Ministerio Públiko.
Durante elekshon di 19 di mart 2021, un total di 353 persona ku tabata kandidato riba un di e 15 listanan. Den e Rapòrt di Annual di 2021 di KE ta menshoná lo siguiente: ” riba 23 di september 2021, KE, konforme na e regla legal, a notifiká Prokurador-Generaal ku pa e fecha ey, 87 kandidato no a kumpli ku artíkulo 12 lid 2 di e regulashon menshona.” Esaki ta 25% di e total kantidat di kandidato.
Argumentonan ‘pro’ i ‘kontra’ di publikashon di dato Fundashon Kòrsou Transparente (Kòrsou Transparente) a organisá un debate durante Dia Internashonal kontra Kòrupshon na desèmber 2021 riba e topiko ‘transparansia’. Un di e deklarashonnan ku a diskutí riba dje tabata: ‘Finansiamentu di partidonan polítiko mester ta públiko’.
Un panel di eksperto for di mundo empresarial i sektor públiko a duna nan punto di bista tokante e asuntu aki. Esnan Pro publikashon a enfatisá ku e ley di finansa aktual no ta adèkua pa logra e transparansia deseá pa pueblo. Segun esnan Pro, publikashon ta benefisioso tanto pa komunidat komo tambe pa e polítiko mes.
Esnan kontra, sinembargo, a argumentá ku publikashon di nombernan di dunadónan di sen por tin konsekuensha pa entre otro empresanan ku por para donashon na partidonan polítiko, kual tin komo riesgo ku e fluho legal di plaka ta para i ku kampaña di partidonan polítiko ta ser finansia ku kapital kriminal. Proposishon di ley inisiativo.
Na 2014, un frakshon di Staten a presenta un proposishon di ley inisiativo pa promové transparansha konforme e rekomendashonnan di TI. Hoofdstembureau (awor Konseho Elektoral) ta bira responsabel pa publiká e resumen ku nan a risibí i e informenan finansiero lo bira disponibel pa tur hende. Partidonan polítiko lo keda liber pa desidí kon nan ta hanja donashon i kon nan ta gasta esaki, teniendo na kuenta ku nan aktonan no ta kontra di lei. E status di e proposishon aki ta deskonosí pa Kòrsou Transparente. ‘Follow the money’ ta importante den kontèksto di krea konfiansa den un demokrasia. Pa evitá ku finansiadó di partidonan polítiko ta wordu benefisiá segun e prinsipio di ‘ken ta paga, ta manda’ i otro.
kompanianan i/òf siudadano ta wordu perhudiká, Kòrsou Transparente ta keda insistí riba un transparansha kompleto tokante e sponsor i dunadó di partidonan polítiko. Finansiamentu di nos partidonan polítiko mester wordu di monitor atentamente pa medio di leinan saludabel i realisabel.
Ainda tin otro buraku tokante e finansiamentu di partidonan polítiko ku TI a konstatá i ku lo wordu analisá den un otro artíkulo. Ta importante pa sigui atendé e rekomendashonnan di e rapòrt aki pasobra e riesgonan di integridat no ta desaparese di nan mes. E rekomendashonnan ku a wordu hasi na 2013, ketu bai ta sigui ta relevante i implementashon di esaki por yudá na un gobernashon íntegro i konfiabel. E artíkulo aki ta e di tres (3) den un sèri di seis (6) kaminda ta tuma e rekomendashonnan for di e di Transparency International ku a wordu publiká há diez aña pasa. OPINION : Fundacion Korsou Transparente.