Tur hende ku ta sigui reunionnan den Konseho Insular òf ta tuma nota di esakinan via medionan sosial mester ta di akuerdo ku’mi, ku e aktual gobernashon sostené pa e koalishon UPB/MPB no ta atendé asuntunan di pueblo ku seriedat. Ta malusá nan mayoria pa pasa tur loke nan ta kere i no ta tene kuenta ku loke kasi mitar di representashon di pueblo ta trese dilanti komo krítika konstruktivo i/o aporte di ideanan na interes di pueblo en general.
Tratamentu di presupuesto ku ta e dokumento mas importante di gobernashon di nos isla ta ser aprobá sin ku gobièrnu ta splika pakiko nan no a usa e fondonan ya aprobá ni tampoko ta splika dikon tin ku usa fondonan for di reserva pa bin ku proyektonan sin ningun splikashon i/o hustifikashon.
Den e último reunion nos por a konstatá ku no ménos ku 44 persona a keda tumá den servisio di gobièrnu riba e asina yamá OVO ku ta un kontrato di trabou speshal pa hasi sierto tareanan den e aparato. Ta konosí ku un hende riba OVO ta risibí tres biaha e montante na salario ku un empleado ku ser tumá den servisio di gobièrnu sea riba un kontrato pa tempu definí o sea den servisio permanente ta gana. Pa kolmo no ta buska yunan di tera pa okupá e funshonnan aki, pero mas ku 90% ta Hulandes Oropeo.
Mirando e tempu ku koalishon a proponé i akordá pa atendé e presupuesto, esta 5 minüt, tabata imposibel pa mi por a trese mas detayá entre otro e asuntu aki dilanti. Djamars awor si CFT duna su konseho riba e kambionan ku frakshon di Partido Demokrat a entregá nos lo mester bai biba atrobe ku koalishon lo vota na fabor di e presupuesto ku tur e defisiensianan ku esaki tin. Despues di a konsultá interno, mi ke informá pueblo ku ami lo no por bai di akuerdo ku e presupuesto presentá i mi ta evaluando ku si mi mester bai e reunion ei mes. Banda di tur esaki, ainda tin riba mesa tres rapòrt ku mester keda tratá esta rapòrt Chogogo, rapòrt di rotònde i rapòrt di Bonlab. I no lubidá ku e vupá ku koalishon a kometé pa loke ta e moshon ku mester a investigá e papel di gezaghèber tambe a keda tapá awor ku e santu ilegal ku e mesun Chogogo a basha kantu di laman. E gobièrnu aki a pèrdè kredibilidat i koalishon ta kere ku malusá nan mayoria lo pone ku pueblo lo lubidá e malgobernashon aki.
Djárason awor mi frakshon tambe ta forma parti di e delegashon ku ta bai Hulanda. Di mi banda mi ta bai ku dos mishon, esta konvensé Ministerio di VWS ku Boneiru mester tin dos laboratorio, opviamente ku kòntròl di akreditashon pa ku e nivel di servisio ku e ta duna.
Mi di dos mishon ta pa konvensé minister Carola Schouten i buskando den esaki sosten di miembronan di Tweede Kamer pa introdusí e mínimo sosial si ta posibel entrante 1 di yanüari 2023 i no warda te 2025. Banda di esaki lo mi hasi esfuerso pa sostené diputado Nina den Heyer pa nos logra ku akohida di mucha lo bira kompletamente grátis.
Tambe lo mi trata na hiba kòmbersashon ku ministerio di enseñansa pa loke ta studiantenan di Boneiru ku ke studia pafó di Hulanda por bin na remarke pa finansiamentu.
Lo mi probechá di e okashon pa sondia unda tin fondonan supstansial relashoná ku konmemorashon di 500 aña Rincon pa yega na un bon sentro pa enkuentronan sosial, deportivo i kultural den Rincon.
