Despues cu FADA a ricibi varios reaccion positivo Fundacion anti droga ta lansa su di tres temporada di documentario basa riba bida real. Den e documentarionan lo tin un variacion di storianan di bida real di personanan cu ta sufri di un adiccion y otronan cu a logra surpasa esaki , pero cu te dia di awe ta biba e consecuencianan. personanan cu ta lucha cu problemanan di salud mental y trauma cu a conduci na adiccion y medicina. FADA a keda funda 37 aña pasa cu e proposito pa preveni abuso di droga y alcohol y otro tipo di adiccionnan riba nos isla. Recientemente FADA a start un reto nobo unda cu ta bin cu e preocupacion di salud mental. E proposito di e documentario ta pa comunidad ta na altura di e origen y e factornan entre otro problemanan social , desbalance den famia, abuso sexual y emocional, abuso fisico, trauma cu mal amistad por conduci cu un persona por tuma decision pa haci uzo di substancia legal of ilegal. Salud mental di un persona ta depende riba con e ta keda cuida y scucha durante di su infancia. Sinembargo hopi biaha nos no ta mira e fruto di esaki dibiaha unda cu añanan y consecuencianan por afecta bida di un ser humano. Ta importante pa reconoce cu e uzo di un substancia legal of ilegal por conduci na problema cu salud mental y e problema di salud mental por hiba na uzo di droga y alcohol. Den e documentarionan Aruba completo ta presencia storianan real y autorisa door di cada un persona cu tabata dispuesto pa conta nan realidad. Cada storia su contenido ta diferente pero remarcabel ta cu tur e storianan aki tin efecto riba salud mental. Esaki no ta solamente di e personanan cu ta pasando den adiccion , pero tambe di su ser nan keri. Adiccion no conoce discriminacion ni color,ni rasa y tampoco religion y sexo. Adiccion por bati na porta di cualkier ser humano. Den e prome documentario a presenta con lihe un adicion por tuma control riba bida di un serhumano. FADA ta traha pa conscientisa nos comunidad mas tanto cu ta posibel riba e tipo di adiccion nan cu tin na Aruba pa asina e mayornan por tene cuenta cu esaki, pero tambe pa e muchanan y hobennan ta mas consciente di e daño cu esaki ta haci na nan. Infancia di un persona ta hopi importante.
FADA a cuminsa cu un seri di documentario pa conscientisa mayor, mucha y hoben riba adiccion legal y ilegal
