“Its time to talk !” ta e cabez di e post cu ex Promer Minister mr. Mike Eman a comparti riba su pagina social ilustra cu un momento di un combersacion entre e dos Promer Ministernan Rutte y Eman den un setting cu un postura hopi habri pa scucha otro; sinta informal riba un trapi ta intercambia pensamento cu atencion mutuo.
E post aki a capta masha hopi atencion y apoyo. Eman a agrega na su post: “Mi ta propone un Mesa Rondo pa nos por yega bek na: “Steunend op eigen kracht, doch met de wil elkander bij te staan”
Eman a haya masha hopi sosten y reaccion. 99% tabata di acuerdo cu mester bai mesa den Reino pa resolbe retonan y logra acuerdonan nobo cu no ta bai pisa asina ferozmente riba comunidad y ta respeta e reparticion di temanan cu ta asunto di Reino y di e paisnan. Un dialogo habri y amplio mester habri caminda pa un desaroyo positivo entre e paisnan den Reino cu atencion pa mehoracion di calidad di bida di e pueblonan.
Practicamente tur e reaccionan tabata sostene e pensamento di exPromer Minister mr. Mike Eman cu mester bai mesa y den un forma habri hiba un discussion cu participacion a base amplio manera tur tempo a tuma lugar ora di tuma decisionan grandi den Reino. Esakinan semper a worde hiba no unicamente entre e gobiernaonan, pero tambe cu e parlamentonan. Conferencianan di Mesa Rondo tabata den trascurso di historia e forum pa e dialogo y e proceso pa yega na decisionan grandi.
“Asina ta busca solucion”, “di acuerdo”, bai pe”, agree !, 100% !, tabata e esencia di decenas di reaccion riba e proposicion di mr. Mike Eman riba su red social. Den un declaracion adicional Eman ta bisa cu comunidad ta hopi preocupa cu pobresa creciente na Aruba, perdida di poder di compra, aumentonan grandi di prijs cu awor lo bai acompanja cu cortamento den cuido, introduccion di Eigen Bijdrage, flexibilisacion di mercado laboral cu lo trece insiguridad di entrada y trabao, y ariba dje un continuacion di recorte di 12.6%, aumento di schoolgeld y un BTW di 18% na caminda.
“Na inicio di COHO mi a manda un Open Memorandum pa Premier Rutte titula: Het Koninkrijk: balans tussen hart en verstand. Awor ta e momento pa nos bai un Mesa Rondo cu “hart en verstand” pa nos logra un mihor resulatdo pa Reino, Aruba y nos hermana islanan y cu lo ta duradero tambe dor di participacion a base amplio”, exPromer Minister Mike Eman ta envatisa.
